1Και διαγενομενου του σαββατου Μαρια η Μαγδαληνη και Μαρια η του Ιακωβου και Σαλωμη ηγορασαν αρωματα ινα ελθουσαι αλειψωσιν αυτον.
2και λιαν πρωι τῃ μιᾳ των σαββατων ερχονται επι το μνημα, ανατειλαντος του ηλιου.
3και ελεγον προς εαυτας Τις αποκυλισει ημιν τον λιθον εκ της θυρας του μνημειου;
4και αναβλεψασαι θεωρουσιν οτι ανακεκυλισται ο λιθος· ην γαρ μεγας σφοδρα.
5και εισελθουσαι εις το μνημειον ειδον νεανισκον καθημενον εν τοις δεξιοις περιβεβλημενον στολην λευκην, και εξεθαμβηθησαν.
6ο δε λεγει αυταις Μη εκθαμβεισθε· Ιησουν ζητειτε τον Ναζαρηνον τον εσταυρωμενον· ηγερθη, ουκ εστιν ωδε· ιδε ο τοπος οπου εθηκαν αυτον.
7αλλα υπαγετε ειπατε τοις μαθηταις αυτου και τῳ Πετρῳ οτι Προαγει υμας εις την Γαλιλαιαν· εκει αυτον οψεσθε, καθως ειπεν υμιν.
8και εξελθουσαι εφυγον απο του μνημειου, ειχεν γαρ αυτας τρομος και εκστασις· και ουδενι ουδεν ειπαν· εφοβουντο γαρ.
9[[Αναστας δε πρωι πρωτῃ σαββατου εφανη πρωτον Μαριᾳ τῃ Μαγδαληνῃ, παρ ης εκβεβληκει επτα δαιμονια.
10εκεινη πορευθεισα απηγγειλεν τοις μετ αυτου γενομενοις πενθουσι και κλαιουσιν·
11κακεινοι ακουσαντες οτι ζῃ και εθεαθη υπ αυτης ηπιστησαν.
12Μετα δε ταυτα δυσιν εξ αυτων περιπατουσιν εφανερωθη εν ετερᾳ μορφῃ πορευομενοις εις αγρον·
13κακεινοι απελθοντες απηγγειλαν τοις λοιποις· ουδε εκεινοις επιστευσαν.
14Υστερον δε ανακειμενοις αυτοις τοις ενδεκα εφανερωθη, και ωνειδισεν την απιστιαν αυτων και σκληροκαρδιαν οτι τοις θεασαμενοις αυτον εγηγερμενον ουκ επιστευσαν.
15και ειπεν αυτοις Πορευθεντες εις τον κοσμον απαντα κηρυξατε το ευαγγελιον πασῃ τῃ κτισει.
16ο πιστευσας και βαπτισθεις σωθησεται, ο δε απιστησας κατακριθησεται.
17σημεια δε τοις πιστευσασιν ταυτα παρακολουθησει, εν τῳ ονοματι μου δαιμονια εκβαλουσιν, γλωσσαις λαλησουσιν καιναις,
18οφεις αρουσιν καν θανασιμον τι πιωσιν ου μη αυτους βλαψῃ, επι αρρωστους χειρας επιθησουσιν και καλως εξουσιν.
19Ο μεν ουν Κυριος Ιησους μετα το λαλησαι αυτοις ανελημφθη εις τον ουρανον και εκαθισεν εκ δεξιων του Θεου.
20εκεινοι δε εξελθοντες εκηρυξαν πανταχου, του Κυριου συνεργουντος και τον λογον βεβαιουντος δια των επακολουθουντων σημειων.]]