1IET me kajampwal: Danke Ieowa, o kauleki pjalm akan on mar omui, ir me kotin lapaplap. 2Ni manjan omui kalanan o ni pon omui melel en lolok jili. 3Jan kajan jal eijok o arp o laute. 4Pwe kom kotin kaperen kin ia, Main Ieowa ki ar wiawia; i pan nijinijki dodok en lim ar akan. 5Meid laud ar wiawia kan, Main Ieowa! O meid lol kupur omui! 6Aramaj pweipwei men jota kak dedeki mepukat, o me rotorot amen jota kin injenoki. 7Me doo jan Kot akan kin wojada dueta rä, o me katiwo kan karoj kin majal pajan, lao re pan lokidokila kokolata. 8A komui ta Main Ieowa, me lapalapia, o komui pan duedueta. 9Pwe kom kotin mani duen ar imwintiti kan, Main Ieowa, kom kotin mani, ar imwintiti kan pan joredi, o me morjued akan en kamueit pajan. 10A ai oje pan pwaida dueta oj en man oje tapot, o i pan keikidier le kap. 11O por en maj ai pan perenki ai imwintiti kan, o jalon ai pan polauleki me morjued akan, me kin palian ia. 12Me pun o pan pwaida mau dueta ni pot, a pan kakairida dueta jeder en Lipanon. 13Me patidier nan tanpaj en Ieowa, pan pwaida mon pera jaraui en atail Kot. 14Menda ma re pan mala, pwe re pan pil majal pajan, o wa, o kelail. 15Pwe re pan kajaleda, me Kot me pun, i ai paip o jota japun mi re a.