1KOT en kotida, pwe a imwintiti en kamueit pajan, o me kailonki i, en tan wei. 2Kom kotin paki irail wei dueta adiniai, dueta krij kin pei pajan nan kijiniai, iduen me doo jan Kot akan en joredi. 3A me pun kan en pereperen o popol mon jilan en Kot o ren pereperen melel. 4Kauli on Kot, kauli on mar a! Kaonopada al o on i, me kotiwei nan jap tan, a maraneki Ieowa — komail perenki i! 5Pwe i Jam en me japoupou kan o jaunkapun en li odi kan. I Kot nan japwilim a tanpaj jaraui. 6Kot me kotin kadire kila jeri ko im en me kin kelep, me kin lapwada me jalidi kan, pwen pwaida o pereperen a me katiwo kan pan mimieta nan wajan lek. 7Main Kot, ni anjau kom kotiwei mon japwilim omui aramaj akan, ni omui kotiwei nan jap tan! Jela. 8I anjau jap o rerer, o audepan lan kan moredier mon jilan en Kot, nana Jinai mon jilan en Kot en Ijrael. 9Main Kot, kom kotin kamoredier katau mau, o kom kotin kamauradar japwilim omui jojo, me monedier, 10Pwe japwilim omui pwin diar waja, me a kak kotikot ia. Main Kot, kom kotin apwalilar me luet akan duen omui kalanan. 11Ieowa kotikidier a majan ki pwin en wanporon kalaimun akan. 12Nanmarki en karij toto tan wei madan, o waun im akan nek pajaner, me re atia jan ar imwintiti kan. 13Ni omail kairu nan pun en noumail pwin man akan, komail rajon pa en muroi men, me linan dueta jilper o pa a kan dueta kold linan. 14Ma me Manaman o lao kotin kamueit pajan nanmarki kan, nana Jalmon rotorot ap pan marainla. 15Nana Pajan iei nana en Kot; Pajan nana kalaimun eu. 16Menda komail nana kalaimun akan kin kilekilan ap peirin on nana, me Kot kotin piladar en kotikot ia? O Ieowa pan kotikot waja o kokolata. 17War en Kot me kid toto pan pak kid; Ieowa kotikot re ’rail ni nana Jinai. 18Komui kotidalan poa o jaliedier me jalidi kan, o kom kotin ale on aramaj pai kan, pil on ir me katiwo kan, pwe Ieowa en kotikot waja o. 19Kapina Ieowa nin ran akan karoj; Kot kin kotiki on kitail katoutou patail, ap pil kotin jauaja kitail. Jela. 20Atail Kot iei jauaj patail, o Ieowa Kaun kin kotin dorela jan mela. 21Melel, Kot pan kotin kawela monan a imwintiti kan, o a pan kotin lejer pajan takain monan ir, me dadaurata ar katiwo. 22Ieowa kotin majanier: I pan kapure don ir jan nan Pajan, I pan wa ir do jan nan kapin madau; 23Pwe koe en tiakedi on nan ntan imwintiti kan, o noum kidi kan en tamotamo. 24Main Kot, a janjal duen omui kotikot jili, duen omui kotikot jili nan mol omui jaraui, ai Kot o ai Nanmarki. 25Pwin en kaul kin tion, ap pwin en jaunkajan nan pun en peinakap akan, me wiadar aip. 26Kapina Kot Ieowa nan momodijou kan, komail me kijan parer en Ijrael. 27Peniamin tikitik kin kakaun nan pun ar, jaupeidi en Iuda ianaki japwilim ar akan toto, jaupeidi en Jepulon, o jaupeidi en Naptali. 28Omail Kot kotin kauadar omail wei; Main Kot, i me komui en kotin katenetenedi, pwe japwilim omui dodok. 29Nanmarki kan pan wa don uk ar kijakij pweki omail im en kaudok nan Ierujalem. 30Kom kotin lipor on man en nan rau, o pwin kau ol ianaki na kan, o wei kan, me kin pepei pweki kijin moni. Kotin kamueit pajan wek kan, me kin men mauin. 31Jaupedi en Äkipten pan pwarado; men Moren pan pokadan Kot pa ’rail. 32Komail wei kan nin jappa kauli on Kot, kakaul o kapina Ieowa. Jela. 33I, me kin kotikot jili nanlan, nanlan en majia! Kilan, a kin kotiki on japwilim a nanjapwe manaman. 34Komail kamelele mana en Kot! A linan mi ren Ijrael, o a mana mi nan tapok kan. 35Kot meid kapuriamui nan mole jaraui. I Kot en Ijrael. A pan kotiki on aramaj akan mana o kelail. Kapina Kot!