1MAIN Ieowa kom kotin dore ia la jan aramaj jued akan; pera jan ia aramaj morjued akan. 2Me lamelame jued nan monion arail, o kareda pei nin ran karoj. 3Irail kin ada lo arail dueta jerpent; poijen en jerpent mi pan lo arail. Jela. 4Pera wei jan ia pa en me doo jan Kot akan, o aramaj morjued akan, me kin madamadaua duen ar pan kawe ia la. 5Me aklapalap akan kin rir injare ia, o uk pot, me re wiai on ia liman al o; o jon, en men kol ia di, me re wiadar. Jela. 6A nai indan Ieowa: Komui ai Kot; kom kotin ereki ai nidinid, Main Ieowa! 7Ieowa Kaun, iei jauaj pa i kelail; ni anjau en pei komui peraer mon ai. 8Main Ieowa, kom der kotin mueid on me doo jan Kot akan ar inon; o der kotin kapwaiada injen ar, pwe re de aklapalapala. Jela. 9Me jued kot, me ai imwintiti kaonopadan ia en japal won pein irail. 10Kijiniai en moredi on po ’rail; A en kotin kaje irail di nan kijiniai, nan lapake, pwe ren jolar pitila. 11Me lo a jued, ender pwaida nan jap o, ol morjued, me jued en pakipaki i, lao a pan pupedi. 12I aja, me Ieowa pan kotin apapwali me luet akan, o jauaj pun en me jamama kan. 13Melel, me pun kan pan kapina mar omui, me melel akan pan mimieta mon jilan ar.