1MAIN, Ieowa, kom kotin kadiarokada lol i, ap kotin mani ia. 2Kom pil kotin mani ma i momod de uda, ap kotin mani ai lamelam ni ar kotin doo jan ia. 3Ir me kotin kupura ia ni ai potopoto jili, o ni ai wonon, ap kotin mani ai tiak kan karoj. 4Melel Main Ieowa, jota ai poto jan ni lo i, me kom jota kotin mani. 5Kom kin kotin ieian ia waja karoj, o kom kin kapado lim omui po i. 6Mepukat meid kapuriamui on ia, meid apwal, i jota kak dedeki. 7Ia waja, i pan kak ko jan mon nen ar ia? O ia waja, i pan kak piti jan jilan ar ia? 8Ma i piridala nanlan, kom kotikot waja o, o ma i onop on wendi nan wajan mela, kom pil kotikot ia. 9Ma i ale pan pir en umpul en katipin, ap mimieta ni kailan madau, 10Lim ar pil pan kare ia waja o, o lim ar maun pan kolekol ia. 11Ma i pan inda: Rotorot en kadupwal ia di, pon ap pil pan marainla imp ai. 12Pwe rotorot jo kin rotorot mo omui, o pon kin marain dueta nin ran, rotorot kin dueta marain. 13Pwe kom me kotin wiadar mudilik i, o kom kotin wia ia da nan kaped en in ai. 14I danke komui, duen kapuriamui en ai wiaui ia da, meid kapuriamui japwilim ar dodok kan, nen i pil dedeki melel mepukat. 15Kokon ai kan me janjal on komui ni ai wiauier waja rir, ni ai wiauier waja lol en jappa. 16Jilan ir mani ia ni ai jaikenta wiauier, o ran karoj me kokodo, ap jaikenta mia, me kileledier nan japwilim omui puk o. 17Main Kot, meid kajampwal on ia duen meakan karoj, me komui kin kupukupura! 18Ma i pan wadok ir, i jota pan kak on, pwe re me toto jan pik en oror, ni ai pirida, i kin mimieta re omui. 19O Main Kot, kom jota men kamela me doo jan Kot akan; o me kin inon ion nta, en muei jan ia! 20Pwe re kin lokaia jued duen komui, o japwilim omui imwintiti kan kin kanudi ni jokarepa. 21I kin kailonki, Main Ieowa, me kin kailonki komui, o i juedeki ar palian komui. 22I kin kailon kin ir melel, re wialar ai imwintiti. 23Main Kot, kom kotin kajaui ia, o mani duen monion i, kotin rapaki duen me i kin lamelame. 24O kom kotin majani, ma i mi pon al jued, o kotin kalua ia pon al joutuk.