1KAPINA mar en Ieowa, papan Ieowa, komail kapina! 2Komail me mi nan tanpaj en Ieowa, nan pera moa en tanpaj en atail Kot. 3Kapina Ieowa, pwe Ieowa me kalanan; kauleki mar a, pwe i me mau. 4Pwe Ieowa kotin piladar Iakop, o Ijrael, pwen japwilim a. 5Pwe i aja, Ieowa meid lapalap, o atail Kot me lapa jan kot akan karoj. 6Karoj me Ieowa kotin kupura, a kin wiada nanlan o pil ni jappa, nan madau o pajed. 7A kin kotin wiai on tapok kan, ren dauda jan ni imwin jappa, me kin kotin wiada liol o pil katau, me kin kotin kadarala kijinian jan nan a pera kan. 8A kotin kamelar mejeni kan nan Äkipten karoj ren aramaj o man akan. 9O kotikidan uk, Äkipten, kilel o manaman akan, on Parao o na ladu kan karoj. 10Me kotin kaloedi wein men liki kalaimun akan o kamelar nanmarki kelail akan. 11Jiion, nanmarki en Amon, o Ok, nanmarki en Pajan, o wei en Kanaan karoj. 12O kotiki on japwilim a men Ijrael jap arail, pwe ren jojoki. 13Ieowa, mar omui pan potopot eta; Main Ieowa, kataman pa omui pan jan eu kainok lel eu. 14Pwe Ieowa pan kotin kapun japwilim a aramaj akan, o a pan kotin maki on japwilim a ladu kan. 15Dikedik en ani mal en men liki kan wiaui kida jilper o kold, me pa en aramaj wiadar. 16Au arail mia, ap jaja lokaia, por en maj arail mia, ap jota kak kilan waja; 17Jalon arail mia, ap jota kak ron waja, pil jota an mi nan au ar. 18Me kin wiada pukat me dueta irail, o pil karoj, me kin liki irail. 19Kadaudok en Ijrael en kapina Ieowa! Kadaudok en Aron en kapina Ieowa. 20Kadaudok en Lewi en kapina Ieowa! Komail me majak Ieowa, en kapina Ieowa! 21Kapin on Ieowa jan nan Jion, me kotikot Ierujalem! Aleluia!