1MAIN Ieowa, kom kotin tamanda Dawid o a apwal akan karoj, 2Me kauki on Ieowa, o a inauki on Kot manaman en Iakop: 3I jota pan pedelon on nan im ai, o i jota pan wendi pon loj, 4I jota pan mueid on maj ai en mair, de por en maj ai, en mair pena, 5Lao i pan diar ekij waja on Ieowa, wajan tanpaj en Kot manaman en Iakop. 6Melel, je roner duen i nan Eprata; je diaradar i nan jap en Iaar. 7Je pan pedelon on nan tanpaj a o kaudok ni utipa. 8Kotida, Main Ieowa, koti don omui kamol, komui o kopan omui manaman! 9Japwilim omui jamero kan en likau kida pun, o japwilim omui me jaraui kan en pereperen. 10Re der jopwei jan maj en japwilim omui me keidier, pweki Dawid japwilim omui ladu. 11Ieowa kotin kaula on Dawid kaula melel eu, o a jota pan kawukila: I pan kajapwiladan mol om kijan kadaudok om. 12Ma noum jeri ko pan kolekol ai inau, o ai kujoned akan, me I pan kawewe on irail, nairail jeri ko ap pil pan mondi pon mol om kokolata. 13Melel Ieowa kotin pilada Jion, o a kotin men kotikot waja o. 14Iet wajan ai kamol kokolata; wata et, me I pan kaukaujon ia, pwe waja et I kin mauki. 15I pan kapaiada kan a mana, o pan ki on me jamama re ’rail prot toto. 16O I pan kalikauwi kida maur arail, jamero kan, o me lelapok re ’rail pan nijinij laud. 17I waja mana en Dawid pan pwaida mau, I kaonopadan nai, me keidier, marain eu. 18I pan kalikauwi kida namenok a imwintiti kan a kapwat en nanmarki pan mi pon mona.