1KAPINA Ieowa, pwe i me mau, pwe a kalanan pan potopot eta. 2Iduen me dorelar ren Ieowa kan pan indinda, irail me a kotin dorelar jan nan pa en arail imwintiti; 3Me a kotin kapokon pena jan jap en maj en lan, o kapin lan, o pali apan, o jan madau. 4Irail janjalon jili nan jap tan, pol al apwal, re jota diarada deu ’rail. 5Re men manadar o men nim piladar, o kaped arail luetalar. 6Rap weriwer won Ieowa ni ar kankaneraner, o a kotin dore ir jan nan ar apwal akan. 7O a kotin kalua ir pon al pun, pwe ren lel on wajan kaukaujon. 8Ren kapina Ieowa, pweki a kalanan o pweki a dodok manaman on aramaj akan. 9Pwe a kotin kamede kilar kaped en me men nim piladar, o kadir kila me mau kan kaped en me men manadar. 10Me mi ni waja rotorot o mot en mela, me jalikidi luet o mata. 11Pweki ar katiwo on majan en Kot, o ar mamaleki kujoned en ma lapalap o. 12I ap kaloke kin ir apwal akan, re wonon, a jota jauaj parail. 13Rap weriwer won Ieowa ni ar apwal akan, i ap kotin dore ir ala jan katoutou parail. 14A kotin kalua ir jan nan rotorot, o mot en mela, o kotin kamueit pajan ar jal akan. 15Ren kapina Ieowa, pweki a kalanan o pweki a dodok manaman on aramaj akan. 16Pwe a kotin kawela wanim mata, o a kotin juk pajan katen mata pan wanim akan. 17Me pweipwei kan pan kalokolokki al en ar katiwo o ar japun kan. 18Kaped arail kin juedeki jon en mana karoj, o re lel on kailan mela. 19Rap weriwer won Ieowa ni ar apwal akan, i ap kotin dore ir ala jan katoutou parail. 20A kotin kadarado japwilim a majan, o kotin kamaur irail da, o kotin jauaja ir jan nan ar por akan. 21Ren kapina Ieowa pweki a kalanan o pweki a dodok mau on aramaj akan. 22O ren maironki mairon en kapin o kajokajoia duen a wiawia kan ki peren! 23Me kin mi pon madau o dake jop akan, o me kin netinet pon pil kalaimun akan, 24Irail pukat kin kilekilan wiawian Ieowa kan, o a manaman akan nan madau. 25A kotin majan eta, melimel ap wiaui, me kin kalaudela iluk kan. 26Re kin koda ileile o kodi loledi, likamata kaped arail pei pajan ni ar majak. 27Re rarauk jili dueta me jakaular, o ar lolekon karoj pan joredi. 28Rap weriwer won Ieowa ni ar apwal akan, i ap kotin dore ir ala jan katoutou parail. 29A kotin kawuki on mole melimel, iluk kan ap moledi. 30Rap peren kida, ma re pan moledi, o a kotin kalua ir nan kapitau me re inon ion. 31Ren kapina Ieowa, pweki a kalanan, o pweki a dodok manaman on aramaj akan. 32O ren kapina i nan pokon en aramaj, o ren kapina i nan momod en jaumaj akan. 33A kotin kawuki on jap tan pilap akan, o utun pil akan on jap madekon. 34O jap kajelel eu wiala jap tan en jol, pweki dip en me kaukaujon waja o. 35A kotin kawuki on len pil jap tan, o jap jued on utun pil. 36O a kotin mueid on me men manadar akan, en kaukaujon waja o, o re wiadar deu arail. 37O re kin wia japajap o padukedi mat en wain, me kin wa ni a anjau. 38O a kotin kamau irail la, rap kin totolar, o a kotin kanederela arail man akan. 39O irail malaulaular o namenok kilar me jued, o japai o luet akan. 40A kotin wudokidi on jaupeidi kan namenok, o mueid on ir, ren janjalon jili nan jap tan, waja me jota al mia ia. 41O a kotin pokada me jamama o jan ni a luet, o katotolar kadaudok a dueta pwin akai. 42Me melel akan pan kilan, ap peren kida, o japun kan karoj pan kaku pena au arail. 43Me lolekon kan pan kajampwale ki mepukat, o re pan dedeki kalanan en Ieowa.