1A LAO kotin molipe pena ekriamen oko, ap kotiki on irail kel o manaman, en kaloedi tewil akan karoj o kakelada me jomau kan. 2I ari kotin porone ir ala, pwen padapadak duen wein Kot o kakelada me jomau kan. 3O a kotin majani on irail: Komail der wala meakot pon al o: Jota jokon, de ed, de prot, de moni, amen pil jo pan wa jakit riau. 4O waja kij me komail pan pedelon on nan im eu, komail pan mimieta waja o, komail lao kowei jan ia. 5O meamen kan kajamo komail, komail japalewei jan kanim o, o jipede jan pwel ni nä omail, pwen kadede on irail. 6Irail ari kokola, kakan jili nan kijin kanim akan, padaki ronamau o kakelada me jomau kan waja karoj. 7A nanmarki Erodej lao mani duen meakan, me wiauiki i, ap pinidar, pweki akai katitiki, me dene Ioanej iajadar jan ren me melar akan. 8A akai indada, me dene Eliaj pwarado, o akai me inda, me dene jaukop en kaua men iajadar, 9A Erodej majani: Ioanej, i me i lepuke jan mon a, a ij men et, me i kin roneron due? A ap men udial i. 10A wanporon akan lao pure doer, ap kaireki i karoj, me re wiadar. I ari kotin uk irail ada, kotilan waja rir, nan kanim eu, me ad a Petjaida. 11Toun jap o lao ajaer, rap idauenla i, i ari kotin kajamo irail, o kotin padaki on irail duen wein Kot, o kotin kakelada me mau on. 12A lao pan waja ponier, ekriamen potodo potoan on i: Re kotin kadar pajan pokon en, pwen kola nan kijin kanim akan o nan jap, en rapaki wajan pweidi o kan ar kijin mana, pwe kitail kotikot nan jap tan wet, 13A a kotin majani on irail: Komail pan ki on irail kan ar mana! Re potoan on: Lopon prot eta limau o mam eta riamen mi re at. De je pan kola netie don pokon kalaimun wet mana? 14Pwe irail me ol impan limekid. A a kotin majani on japwilim a tounpadak kan: Komail pwini ir pajan wad limek o limek! 15Irail ari wiada o kamod irail edi. 16A kotin limada lopon prot limau o mam riamen, majanda nanlan, laolaoki, pilitiki pena, kotiki on japwilim a tounpadak kan, pwe ren nene on pokon o. 17Irail jak, o karoj medier, ap rikada dodo eijokriau luan kamadip o. 18Kadekadeo ni a kotin laolao kelep, japwilim a tounpadak kan ian i. A kotin kainoma re ’rail majani: Ij me aramaj kin inda me nai? 19Irail japen potoan on: Ioanej jaunpaptaij, a akai me inda Eliaj, o pil akai kin inda, me dene jaukop en kaua men iajadar. 20A kotin majani on irail: A da me komail kin inda ij nai? Petruj ap japen potoan on: Ir me Krijtuj japwilim en Kot. 21A i me kotin padik inapwiedi irail, ren der indan meamen mepukat, 22Majani: Nain aramaj pan kalokolok laud, o lokidokila ren jaumaj, o jamero lapalap, o jaunkawewe kan, o a pan kamela, o ni ran kajilu a pan maureda, 23Ap kotin majani on irail karoj: Meamen men idauen ia i en tonmeteki pein i o ale a lopu ni ran karoj, o idedauen ia do. 24Pwe meamen kanakanai on maur a, pan pupe jan. A meamen kajela maur a pweki nai, pan diarada. 25Pwe da me pan mau on aramaj amen, me aneki pena jappa karoj, ap kajela pein i o kajapokela pein i? 26Pwe me kin namenok kin ia o ai padak kan, i me Nain aramaj pil pan namenokki, a lao kodo ni a linan, o linan en Jam a, o na tounlan jaraui kan. 27A melel I indai on komail, akai irail, me mi met, jota pan mela, irail lao udial wein Kot. 28A kadekadeo murin pon walu pon murin majan pukat i ap ukada Petruj, o Ioanej, o Iakopuj kotidala pon nana o pwen laolao. 29A ni a kotin laolao mom en jilan i ap wukila o japwilim a likau puetepuetela o linalin. 30A kilan, ol riamen ian i majan pena! Ira me Mojej o Eliaj. 31Ira pwarado ni ara linan o mamajani duen a pan kamatala nan Ierujalem. 32A Petruj o me ian i me toutouki mair. Ira lao pirida, re ap udial a linan o ol riamen kotikot impa. 33Kadekadeo ira lao kotiwei jan re a, Petruj ap indan Iejuj: Main, meid mau atail kotikot met. Kit en kauada kijin im jilikij: Tanpaj ar, o en Mojej, o en Eliaj; a jaja me a kajokajoi. 34Ni a kajokajoi mepukat, pali en dapok kadupal irail edi, irail ari majakadar ni ar tilon nan dapok o. 35O nil eu peidido jan nan dapok o majani: Iet nai ol kompok, komail en ron i! 36A nil wet lao wiauier, re ap diaradar Iejuj ta. Ir ari nenenlata; o ni ran oko re jota kaireki meamen duen me re kilaner. 37A kadekadeo manda en ran o irail lao kotidido jan nana o, pokon kalaimun ap poto don i, 38A kilan, ol amen nan pokon o nil laudeda potoan on: Jaunpadak, i poeki re ir, re kotin majani don ai tunol putak o, pwe iei ai ieroj. 39Re kotin mani, nen o lao koledi i, a kin madan weriwer, a kin jenjeroki jili, a ap kin pudopud o meid apwal ni a kin koiei jan i. 40 Nai ari poeki ren japwilim ar tounpadak kan, ren kauje wei jan i, a re jota kak. 41A Iejuj kotin japen majani: O di wet meid jopojon o japun, ia arain ai pan mimi re omail? Ia arain ai pan kokoa komail? Wa don ia noum putak! 42A ni a kokodo, tewil ap kapururada o jeroki jili i, a Iejuj kotin kidaueda nen jaut o, o kakelada putak o, ap kapure on i ren jam a. 43A irail karoj puriamuiki manaman en Kot. A ni ar puriamuiki en Iejuj a wiawia kan ap kotin majani on japwilim a tounpadak kan: 44Majan pukat en kaloledi nan jalon omail: Nain aramaj pan panala ni pa en aramaj. 45A irail jota weweki majan wet, pwe a rir jan irail, i me irail jajaki. Irail ari majak kalelapok re a duen majan pot et. 46Irail ap pil lamelame, ij me pan lapalap re ’rail? 47A Iejuj lao kotin mani ar lamelam nan monion arail, ap ale jeri men, kida impa a, 48O majani on irail: Meamen pan apwali kijin jeri men et ni ad ai, nan a kin apwali ia, a meamen pan apwali ia, nan a kin apwali, me kadar ia do; a me tikitik re omail, nan i me pan lapalapala. 49Ioanej ap japen potoan on: Main, je kilaner amen, me kaujewei tewil akan ni mar ar. Kit ari inapwiedi, pwe a jota kin ian kit idedauen ir. 50A Iejuj kotin majani on i: Eder inapiedi, pwe me jo kin palian komail, nan a kin ian komail. 51A kadekadeo a lao anjau, me a pan peukadala, a ap kotin jaupeilan kotilan inen won Ierujalem. 52A kotin poronela men kadar akan, me pan tion mo a. Irail ari kokola lele don kijin kanim en Jamaria eu, pwen rapaki waja, me a pan pweiokidi ia. 53A re jota kajamo i aki a kotin jaupeila kotilan inen won Ierujalem. 54Japwilim a tounpadak kan Iakopuj o Ioanej lao kilaner mepukat, ap potoan on: Main, ma re kotin kupura, je pan poeki, kijiniai en moredi jan nanlan, kan irail la, duen Eliaj wiadar. 55A i kotin jaupeido, kapun on ira majani: Koma jota aja ij Nen, me naina kin koma? 56Irail ap daulul wei nan eu kijin kanim. 57Kadekadeo ni arail kotikot kokodo amen ap potoan on i: Main i pan idedauen ir waja karoj me re pan kotila ia. 58Iejuj kotin majani on i: Pokj akan por ar mia, o manpir en pan lan paj ar mia, a Nain aramaj jota waja en kaula wei mon a. 59A kotin majani on amen: Idauen ia do! A i indada: Main, komui kotin mueid on ia maj, i en purela jarepedi jam ai. 60A Iejuj kotin majani on i: Me melar akan en jarepedi ar melar akan, a koe kowei kalok jili wein Kot! 61Pil amen potoan: Main, i pan idedauen ir jili, a re kotin mueid on ia maj, i en kamurimuri on toun im ai. 62A Iejuj kotin majani on i: Jota me pan koledi men weirada pwel, ap kilan muri, a jota koiok on wein Kot.