1IEI Melkijedek nanmarki en Jalem o jamero en Kot lapalap amen, me kotilan tu on Apraam, ni a pure do jan a kaloedi nanmarki kai, ap kapaida i; 2Me Apraam pil kotiki on eijok kij eu jan ni a dipijou karoj. Iet wewe kaieu en mar a: Nanmarki en pun; ap pil: Nanmarki en Jalem, iet wewe: Nanmarki en popol; 3Me jota jam a, jota in a, jota a kainok, jota tapin a ran akan, pil jota imwin maur. A a raj on Japwilim en Kot, o a pan jamero kokolata. 4Komail kilan ol lapalap men et, me jam atail Apraam kotiki on eijok kij eu en a dipijou, me lodier. 5Melel eta kadaudok en Lewi, me kajapwiladan dodok en jamero, arail kujoned mia, me ren ale jan ren aramaj akan, iei ri arail akan, eijok kij eu, duen kapun, a ir pil kijan kadaudok en Apraam. 6A i, me jota kijan irail, ale eijok kij eu jan ren Apraam o kapaiada i, me aleer inau o. 7Nan melel kaualap me tikitik o kin paida jan ren me lapalap. 8Ari met, aramaj akan me udan mela, kin ale eijok kij eu, a mo amen, me kadedepa mia, duen a ieiajata. 9Ari melel, pil kadaudok en Lewi me kin ale eijok kij eu, kida eijok kij eu on (Melkijedek) ki Apraam. 10Pwe a mimieta nan lonelon en jam a, ni anjau Melkijedek kotilan tu on i. 11Ari, ma dodok en jamero Lewi unjokela — pwe i anjau irail aleer kapun o — da katepan amen jamero en pwarado ni al en Melkijedek, a kaidin ni al en Aron? 12Pwe ma dodok en jamero wukila, nan kapun pan pil wukila. 13A i, me je indinda, i kijan eu kainok, a jota amen jan nan kadaudok wet apwalier pei jaraui. 14Pwe meid janjal, me Kaun patail tapi jan Iuda. Ari, iran jau wet Mojej jota katitiki meakot duen jamero. 15Mepukat janjal melel, ma amen jamero pan kotido ni al en Melkijedek, 16Me jota kajapwiladar pan tiak en kujoned uduken, pwe pan manaman en maur joutuk. 17Pwe iet kadedepa: Komui jamero joutuk amen duen al en Melkijedek. 18Pwe i me kujoned en maj nikier, pwe me luet o jota katepa, 19Pwe kapun jota kak kaunjokala meakot, a kaporopor me mau jan men maj, pan id pwarado, me kitail kak tuki on Kot. 20O iet pil eu kajampwal: Pwe a kajapwil kida kaula — a irail wiala jamero ni jota kaula. 21A men et japwilikida kaula ren i, me kotin majani on i: Kaun o kaular, a ap jota pan kalu kila: Komui jamero joutuk amen duen al en Melkijedek. 22Iei me Iejuj pil wiala kapun pan inau, me mau jan men maj. 23A irail me toto, me wialar jamero, pweki ar matalar, kareda, me irail jota kak mimieta. 24A i me potopoteta, pwe a kotin aleer dodok en jamero joutuk. 25Ari, i me a kotin kak kamaureda melel ir karoj, me kai ki on Kot i, pwe a kotin ieiajata, pwen laolao kin ir. 26Pwe iduen jamero lapalap me mau on kitail, me jaraui, o jo japun, o jo jamin, o me liki jan me dipan akan, o ileila jan nanlan. 27Me jota rajon jamero lapalap akan, me kin kida maj mairon pweki pein dip arail ap pweki en aramaj akan ni ran karoj. Pwe i me a kotin wiadar pan pak ta ieu, ni a kotin mueid on Kot pein i. 28Pwe kapun kin kajapwiladan jamero aramaj luet akan, a majan en kaula, me wiauier murin kapun, kajapwiladar Japwilim a, me unjokalar joutuk.