1PWE kitail ajaer, impwal atail jappa a lao ola, kitail pan id imaneki im eu jan ren Kot, im eu me kaidin wiaui kida pa, pwe a me joutuk nanlan. 2I me kitail kin janejan o inon ion im jan nanlan en kalikau kitail da. 3Pwe ma kitail likaudar, kitail jolar pan kilijo. 4Pwe ni atail deula impwal wet kitail kin janejan o patau, pwe kitail jota men pure jan atail likau, a je men kadupaledi, pwe maur en katalala mela. 5A me wia kin kitail on mepukat, i Kot me pil kotiki on kitail er komoan Nen. 6Kitail ari injenemau anjau karoj o ajaer, ni atail kaujon ki war, kitail kin doo wei jan Kaun. 7Pwe kitail kin weweid ni pojon a kaidin ni kilan. 8Ari jo, kitail kin injenemau o inon ion muei jan war atail, ap mimi nan deu atail ren Kaun o. 9Nan i me kitail kin nantion kaperen i, ma ni deu ’tail de ni at doo wei jan. 10Pwe kitail karoj pan janjal mon mol en kadeik en Krijtuj, pwe amen amen en ale pwain en a wiawia arain a maur ni pali war, ma me mau de me jued. 11Kit ajaer, me jen majak Kaun o, i me je kin kanekanai on at dodok on aramaj akan, ap kin janjal on Kot. A i pil kaporoporeki me je pil janjal on nan injen omail. 12Pwe kit jota japal juaiki pein kit on komail, a je pan on komail, en kapin pat, pwe peikite pamail en mia on irail, me kin juaiki maj arail, a jo monion arail. 13Pwe ni at mi likin war at, a kin wiaui on Kot, a ma jo, je kin dodok on komail. 14Pwe iduen limpok en Krijtuj kanon kin kit, pwe je kajauiadar, me amen mata kila karoj, i me irail karoj mekilar. 15A i mata kilan karoj, pwe irail me memaur, der memaur on pein irail, a on i, me mata kin irail lar o me kaiajadar. 16I me je jolar aja amen ni pali uduk. Ei, maj o je ajaer Krijtuj ni pali uduk eta, a met je jolar aja i due. 17Ari ma amen mi ren Krijtuj, nan a wilikapadar; men maj momelar, kilan, karoj wilikapada. 18A meakan karoj jan ren Kot, me kotin kalolamaui on pein i kitail ki Iejuj Krijtuj, me kotiki on kit at koa dodok, duen padak en kalolmau. 19Pwe Kot kotikot ren Krijtuj o kotin kalokalolamau on pein i jappa, o jolar kapokon on irail dip arail akan, o kotiki on kitail majan en kalolamau. 20Ari, kit men en kadar en Krijtuj, pwe Kot kin panaui ki kit. Kit wiliandi Krijtuj ap poekipoeki kin komail: Komail kalolamau pein komail on Kot! 21Pwe Kot kotin kapokonki on, me jo dip a, dip atail, pwe kitail en pun kila pa ren Kot.