1ARI pein nai Pauluj men panaui komail nin tiak en opampap o limpok en Krijtuj; pwe ni ai mi nan pun omail, i kin aktikitik, a ni ai doo wei jan komail, i kin kelail on komail 2A i kin kapakapeki, pwe i ender kelail ni ai pan korendo; pwe i kileledier o lamelame, me i pan kelail on akai, me kin wia kin kit men kekeideki tiak en pali uduk. 3Pwe melel, je kin mimita nan uduk, ap jota pepei ni tiak en uduk. 4Pwe kapwa en at pei kaidin men ni pali uduk, pwe me manaman mon Kot, me mau on kawela waja teneten kan. 5Ni at kin kawela me akapun o me aklapalap, me kin palian erpit en Kot; o kit kin jaliedi jon en lamelam karoj, pwen oke Krijtuj. 6O audaude on kaloedi me katiwo karoj, omail peik lao pwanokadar. 7Komail kin kilekilan meakan me janjal? Ma amen lamelame, me pein i japwilim en Krijtuj, i en pein lameda, me kit pil japwilim en Krijtuj dueta i. 8Pwe ma i pan juaiki laude jan at manaman, me Kaun o kotiki on kit, pwen kamaui a kaidin kawe komail la, i jota pan namenokki. 9Pwe ender janjal duen amen me men kamajak kin komail nai kijin likau kan, 10Pwe irail me inda: Kijin likau kan me kajampwal o manaman, a janjal en pali war a me luet, o a padak me mal kot. 11A me duen met, a en aja duen at kin inda nan kijin likau kan ni at doo wei jan komail, iduen pein kit ni at wiawia kan nan pun omail. 12Pwe kit jota man mauki waroki on me kin juaiki pein irail; a irail me jololekon, pweki ar jojon pein irail nan pun arail. 13A kit jota men juaiki me laud jan me kon on, a duen men jon eu, me Kot kotin pan on kit, jon eu, me itar lel on komail. 14Pwe kit jota inon ion, me jota kon on, dene je jota pwar won komail er, a je pil walan komail ronamau en Krijtuj. 15Kit jota kin juaiki me laud jan me kon on, dene je juaiki en amen a dodok. A je kaporoporeki omail pojon lao kakairida, at dodok pil pan laud jan re omail, 16Pwen pil padaki ronamau nin jap akan palila jan komail, a kaidin wajan dodok en amen o jota juaiki me wiauier. 17A ma amen men juaiki, i en juaiki Kaun o. 18Pwe kaidin i meakot, me kin kapina pein i, pwe i eta, me Kaun o kin kapina.