1ARI, ri ai kan, je pil poeki re omail o panaui kin komail Kaun Iejuj, duen me komail aleer jan kit, o duen me komail en kekeideki wei, o kaperenda Kot, iduen omail kakairida. 2Pwe komail aja duen kujoned akan, me je pan on komail ren Kaun Iejuj. 3Pwe iet kupur en Kot, omail jarauila, pwe komail en liki jan nenek. 4Amen amen en kanai on pein war a, pwen jaraui o wau o liki jan inon jued, 5Kaidin ni dender on inon jued duen men liki kan, me jo aja Kot; 6O jota me pan piti de kajapuni on ri a ni meakot, pwe Kaun o pan kotin iki on i, duen me kit inda o kadede on komail er maj o. 7Pwe Kot jota molipei kitail on jamin, a pwen jaraui. 8A ma amen komail pan mamaleki mepukat, kaidin aramaj me a pan mamaleki pwe Kot, me pil kotiki on komail er japwilim a Nen jaraui. 9A duen limpok en jaulan, menda i en intinki won komail, pwe pein komail padakki jan ren Kot, me komail en poke pena. 10Nan met komail kin wiai on jaulan karoj, me mimi Majetonien pon. A je panaui kin komail ri at akan, komail en kakairida. 11O komail nenenla o inon ion apwali pein omail dodok, kadokeki pein pa omail, duen me je padaki on komail er, 12Pwe komail en janjal mau mon me mi liki kan, o komail der mau on amen en apwali komail. 13Ri ai kan, je jota men oki jan komail duen me mairelar akan, pwe komail der injenjued dueta irail, me jota ar kaporopor. 14Pwe ma kitail kamelele, me Iejuj matala ap iajadar, nan iduen me mairelar ren Iejuj, Kot pil pan kalua ir ala re a. 15Pwe ieteten me je indan komail ni majan en Kaun o, kit me memaureta lao Kaun o pan kotin pwarado, jota pan ko wei mon me mair akan. 16Pwe pein Kaun o pan kotido jan nanlan ki majan laud, o kapiti en toulan lapalap amen, o koronete en Kot; me melar akan ren Krijtuj ap pan maureda maj. 17Kit me memaureta luadi ap pan ian ir peukadala nan dapok kan, ko on ren Kaun o nan wäwä, kitail ap pan mimieta ren Kaun o kokolata. 18Komail ari kamaiteki komail la padak pot et.