1[Fili mi, ne obliviscaris legis meæ, et præcepta mea cor tuum custodiat: Fili mi, ne. Docet misericordiæ operibus insistendum, etc., usque ad ornat actibus bonis, quem instruit. 2longitudinem enim dierum, et annos vitæ, et pacem, apponent tibi. Pacem, id est, statum beatitudinis, etc., usque ad longo tempore in pacis quiete viveret. 3Misericordia et veritas te non deserant; circumda eas gutturi tuo, et describe in tabulis cordis tui: Misericordia et veritas. Ab ore tuo nunquam absit veritas dicenda, nunquam ab opere proximo misericordia impendenda: sic enim fit, ut et te Dei semper prosequatur misericordia, quæ deleat peccata; veritas vero, quæ compleat promissa. Circumda eas gutturi tuo. In gutture organum vocis, etc., usque ad nec voci vita contradicat. 4et invenies gratiam, et disciplinam bonam, coram Deo et hominibus. Et invenies gratiam. Coram Domino, etc., usque ad et proximis exemplum vivendi præbeat. 5Habe fiduciam in Domino ex toto corde tuo, et ne innitaris prudentiæ tuæ. Habe fiduciam in Domino. Ne metuas ob imbecillitatem tuam, etc., usque ad et quod jussit, ut implere valeas, donabit. Ne sis sapiens. Videtur idem dixisse, etc., usque ad quæ sit autem vera hominis sapientia sic ostendit: 6In omnibus viis tuis cogita illum, et ipse diriget gressus tuos. 7Ne sis sapiens apud temetipsum; time Deum, et recede a malo: Time Deum et recede a malo. Quale est illud in Job, etc., usque ad divini timoris memoria cœrcet. 8sanitas quippe erit umbilico tuo, et irrigatio ossium tuorum. Sanitas quippe erit. In ossibus solida virtutum opera, etc., usque ad unde amplius roborentur, accipient. 9Honora Dominum de tua substantia, et de primitiis omnium frugum tuarum da ei: Honora Dominum de tua substantia. Ut scilicet homines, qui ejus palma sunt, qui ad ejus imaginem facti sunt recreentur. Et de primitiis omnium. Non solum de substantia pecuniæ, etc., usque ad non sibi, sed ei tribuit. 10et implebuntur horrea tua saturitate, et vino torcularia tua redundabunt.] Implebuntur horrea tua saturitate. Thesaurizate vobis thesauros in cœlo. Si sancti thesauros habent in cœlo, etc., usque ad cœlesti remuneratione, redditur. Torcularia redundabunt. Quia interna suavitas æternorum corda cunctorum fidelium in laude sui conditoris accendit. Hic etenim dicit: Ut edatis, etc. 11[Disciplinam Domini, fili mi, ne abjicias, nec deficias cum ab eo corriperis: Disciplinam. Sunt qui in prosperis serviunt Domino, etc., usque ad pietatem, quam in tranquillitate videbatur habere, amittat. 12quem enim diligit Dominus, corripit, et quasi pater in filio complacet sibi. Quem enim diligit Dominus corripit. Tanto ergo minus, etc., usque ad unde ipse ait: Ego quos amo, arguo et castigo. 13Beatus homo qui invenit sapientiam, et qui affluit prudentia. Beatus homo, etc. Quia positos sub disciplina, etc., usque ad et in futuro ejus visione perfrui. Et qui affluit prudentia. Bene, cum diceret, etc., usque ad corda sua ad percipiendam ejus amplitudinem laxare. 14Melior est acquisitio ejus negotiatione argenti, et auri primi et purissimi fructus ejus. Melior est. Non metuat de correctione inopiæ, quisquis opes acquisivit sapientiæ, omnibus enim thesauris munus cœleste præcellit. Primi et purissimi. Quia radix sapientiæ timor Domini, hi sunt primi ac purissimi fructus, etc., usque ad a Domino perfectius promittitur. 15Pretiosior est cunctis opibus, et omnia quæ desiderantur huic non valent comparari. 16Longitudo dierum in dextera ejus, et in sinistra illius divitiæ et gloria. Longitudo dierum in dextera ejus et in sinistra. Visione suæ divinitatis, etc., usque ad et in futuro vitam æternam. 17Viæ ejus viæ pulchræ, et omnes semitæ illius pacificæ. Viæ ejus. Actiones et doctrinæ, etc., usque ad pacis et dilectionis exempla pertinent. 18Lignum vitæ est his qui apprehenderint eam, et qui tenuerit eam beatus. Lignum vitæ. Sicut in medio paradisi lignum vitæ, etc., usque ad præsenti beatificabitur aspectu. 19Dominus sapientia fundavit terram; stabilivit cælos prudentia. Dominus sapientia. Typice, per filium Ecclesiam fidei soliditate locavit, stabilivit cœlos prudentia, cum per eum sublimium prædicatorum corda illustravit. 20Sapientia illius eruperunt abyssi, et nubes rore concrescunt.] Sapientia illius eruperunt abyssi. In diebus Nœ, etc., usque ad quæque minoribus in exemplum monstrent, examinant. 21[Fili mi, ne effluant hæc ab oculis tuis. Custodi legem atque consilium, Fili mi, ne effluant. Ne disciplina temporali fatigatus, sapientiæ, quæ tanta est, gratiam perdas, præcave. 22et erit vita animæ tuæ, et gratia faucibus tuis. Et erit vita animæ tuæ. Habet anima tua vitam cum Deo, si ejus decreta custodieris: quamvis caro disciplina correctionis aut etiam mortis prematur. Et gratia faucibus tuis. Habet ergo sensus animi fauces suas, etc., usque ad: beatus vir qui sperat in eo. 23Tunc ambulabis fiducialiter in via tua, et pes tuus non impinget. Tunc ambulabis fiducialiter. In via nostra fiducialiter incedimus, etc., usque ad hoc est enim quod sequitur: Et pes tuus non impinget. Quoniam diligentibus Deum omnia cooperantur in bonum Rom. 8.. 24Si dormieris, non timebis; quiesces, et suavis erit somnus tuus. Si dormieris, non timebis, quiesces, et suavis. Patet juxta litteram, etc., usque ad quia Deum ubique protectorem habet et custodem. 25Ne paveas repentino terrore, et irruentes tibi potentias impiorum. 26Dominus enim erit in latere tuo, et custodiet pedem tuum, ne capiaris.] 27[Noli prohibere benefacere eum qui potest: si vales, et ipse benefac. Noli prohibere benefacere eum qui. Quia supra diligenter legem Domini et consilium observare monuit, et æternam requiem observantibus promisit: nunc multipliciter, quæ observanda sunt, replicat. Primoque ad id, quod intermiserat, rediens, misericordiam proximo exhibendam, et juste, cum illo docet esse vivendum. Deinde et ab inimico cavendum esse præmonet. Noli ergo, inquit, prohibere. Ne audias a Domino cum Pharisæis: Ipsi non introistis, et eos qui intrabant, prohibuistis Luc. 11.. 28Ne dicas amico tuo: Vade, et revertere: cras dabo tibi: cum statim possis dare. Ne dicas amico tuo: Vade et revertere, cras dabo. Non solum de eleemosynis, sed de omnibus mandatis Christi, qui ait: Vos amici mei estis, si feceritis Joan. 15., etc. 29Ne moliaris amico tuo malum, cum ille in te habeat fiduciam. 30Ne contendas adversus hominem frustra, cum ipse tibi nihil mali fecerit. Non contendas adversus hominem. Non vetat contendere adversus eum qui male facit, ut corrigatur, quia hoc frustra non fit, quod certa necessitas cogit. Imo qui ait: Si peccaverit in te frater tuus, increpa illum Matth. 18., ipse vult, ut errantem, quantum vales, ad viam veritatis reducas. 31Ne æmuleris hominem injustum, nec imiteris vias ejus: 32quia abominatio Domini est omnis illusor, et cum simplicibus sermocinatio ejus. Quia abominatio Domini est omnis illusor. Omnis illusor, inquit; quia illusor est, qui vel verba Dei, quæ novit, implere contemnit, vel eadem perverse intelligendo ac docendo corrumpit. Illusor est et ille, qui promissa ejus, quasi prava, despicit, ac iram districtionis, quasi tolerabilem; spernit. Necnon et ille qui proximorum simplicitati improbus insultat. Ideoque omnem hujusmodi illusorem merito divina abominatur justitia. Bene autem subditur: Et cum simplicibus sermocinatio ejus, quia superbi, dum simplicibus illudunt, prudentiores se illis, quos irrident, judicant. Sed horum prudentia, ut Jacobus ait: terrena est, animalis, diabolica Jacob. 3.. Sermocinatio autem Domini cum simplicibus est, quia illos sapientiæ secretis illustrat, quos terreni fastus ac duplicitatis nihil habere considerat. Unde ait: Abscondisti hæc sapientibus et prudentibus, et revelasti ea parvulis Luc. 10.. 33Egestas a Domino in domo impii; habitacula autem justorum benedicentur. In domo impii. Ut purpurati divitis, qui in hac vita spiritualibus eguit, et post ad tantam pervenit inopiam, ut nec guttam aquæ, quam quærebat, acciperet, unde: Qui benedixit nos in omni benedictione spirituali in cœlestibus in Christo, qui in remuneratione audient: Venite, benedicti, Matth. 15., etc. Sed ad litteram sæpe contingit eos, qui aliena diripiunt, ad ultimum inopia consumi; at illos qui sua largiuntur, etiam bonis abundare terrenis. 34Ipse deludet illusores, et mansuetis dabit gratiam. Illusores. Hos versus Jacobus et Petrus juxta antiquam translationem posuerunt: Quia Deus superbis resistit, humilibus autem dat gratiam Jacob. 4.. 35Gloriam sapientes possidebunt; stultorum exaltatio ignominia.]