1 לכו נרננה ליהוה נריעה לצור ישענו¶
2 נקדמה פניו בתודה בזמרות נריע לו¶
3 כי אל גדול יהוה ומלך גדול על-כל-אלהים¶
4 אשר בידו מחקרי-ארץ ותועפת הרים לו¶
5 אשר-לו הים והוא עשהו ויבשת ידיו יצרו¶
6 באו נשתחוה ונכרעה נברכה לפני-יהוה עשנו¶
7 כי הוא אלהינו— ואנחנו עם מרעיתו וצאן ידו
8 אל-תקשו לבבכם כמריבה כיום מסה במדבר¶
9 אשר נסוני אבותיכם בחנוני גם-ראו פעלי¶
10 ארבעים שנה אקוט בדור— ואמר עם תעי לבב הם
11 אשר-נשבעתי באפי אם-יבאון אל-מנוחתי