1 למנצח לבני-קרח מזמור¶
2 רצית יהוה ארצך שבת שבות (שבית) יעקב¶
3 נשאת עון עמך כסית כל-חטאתם סלה¶
4 אספת כל-עברתך השיבות מחרון אפך¶
5 שובנו אלהי ישענו והפר כעסך עמנו¶
6 הלעולם תאנף-בנו תמשך אפך לדר ודר¶
7 הלא-אתה תשוב תחינו ועמך ישמחו-בך¶
8 הראנו יהוה חסדך וישעך תתן-לנו¶
9 אשמעה— מה-ידבר האל יהוה
10 אך קרוב ליראיו ישעו לשכן כבוד בארצנו¶
11 חסד-ואמת נפגשו צדק ושלום נשקו¶
12 אמת מארץ תצמח וצדק משמים נשקף¶
13 גם-יהוה יתן הטוב וארצנו תתן יבולה¶
14 צדק לפניו יהלך וישם לדרך פעמיו