1 למנצח שיר מזמור הריעו לאלהים כל-הארץ¶
2 זמרו כבוד-שמו שימו כבוד תהלתו¶
3 אמרו לאלהים מה-נורא מעשיך ברב עזך יכחשו לך איביך¶
4 כל-הארץ ישתחוו לך—ויזמרו-לך יזמרו שמך סלה¶
5 לכו וראו מפעלות אלהים נורא עלילה על-בני אדם¶
6 הפך ים ליבשה—בנהר יעברו ברגל שם נשמחה-בו¶
7 משל בגבורתו עולם— עיניו בגוים תצפינה
8 ברכו עמים אלהינו והשמיעו קול תהלתו¶
9 השם נפשנו בחיים ולא-נתן למוט רגלנו¶
10 כי-בחנתנו אלהים צרפתנו כצרף-כסף¶
11 הבאתנו במצודה שמת מועקה במתנינו¶
12 הרכבת אנוש לראשנו באנו-באש ובמים ותוציאנו לרויה¶
13 אבוא ביתך בעולות אשלם לך נדרי¶
14 אשר-פצו שפתי ודבר-פי בצר-לי¶
15 עלות מיחים אעלה-לך עם-קטרת אילים
16 לכו-שמעו ואספרה כל-יראי אלהים אשר עשה לנפשי¶
17 אליו פי-קראתי ורומם תחת לשוני¶
18 און אם-ראיתי בלבי— לא ישמע אדני¶
19 אכן שמע אלהים הקשיב בקול תפלתי¶
20 ברוך אלהים— אשר לא-הסיר תפלתי וחסדו מאתי