1 מדוע—משדי לא-נצפנו עתים וידעו לא-חזו ימיו¶
2 גבלות ישיגו עדר גזלו וירעו¶
3 חמור יתומים ינהגו יחבלו שור אלמנה¶
4 יטו אבינים מדרך יחד חבאו עניי-ארץ¶
5 הן פראים במדבר— יצאו בפעלם משחרי לטרף
6 בשדה בלילו יקצירו (יקצורו) וכרם רשע ילקשו¶
7 ערום ילינו מבלי לבוש ואין כסות בקרה¶
8 מזרם הרים ירטבו ומבלי מחסה חבקו-צור¶
9 יגזלו משד יתום ועל-עני יחבלו¶
10 ערום הלכו בלי לבוש ורעבים נשאו עמר¶
11 בין-שורתם יצהירו יקבים דרכו ויצמאו¶
12 מעיר מתים ינאקו— ונפש-חללים תשוע
13 המה היו—במרדי-אור לא-הכירו דרכיו ולא ישבו בנתיבתיו¶
14 לאור יקום רוצח—יקטל-עני ואביון ובלילה יהי כגנב¶
15 ועין נאף שמרה נשף לאמר— לא-תשורני עין
16 חתר בחשך בתים יומם חתמו-למו לא-ידעו אור¶
17 כי יחדו בקר למו צלמות כי-יכיר בלהות צלמות¶
18 קל-הוא על-פני-מים— תקלל חלקתם בארץ
19 ציה גם-חם יגזלו מימי-שלג שאול חטאו¶
20 ישכחהו רחם מתקו רמה— עוד לא-יזכר
21 רעה עקרה לא תלד ואלמנה לא ייטיב¶
22 ומשך אבירים בכחו יקום ולא-יאמין בחיין¶
23 יתן-לו לבטח וישען ועיניהו על-דרכיהם¶
24 רומו מעט ואיננו והמכו ככל יקפצון
25 ואם-לא אפו מי יכזיבני וישם לאל מלתי