1A LAILA olelo mai la o Biledada, no Suha, i mai la, 2Pehea la ka loihi o kau olelo ana i keia mau mea? A he makani ikaika na huaolelo o kou waha? 3E hookahuli anei ke Akua i ka pololei? A e hookekee anei ka Mea mana i ka pono? 4Ina paha ua hana hewa kau poe keiki ia ia, Alaila kiola aku la ia ia lakou, no ko lakou lawehala ana; 5Ina e imi oe i ke Akua, A e nonoi aku oe i ka Mea mana; 6Ina ua maemae oe a pono hoi; He oiaio no, ina ua ala mai no ia ano nou, A ua hoomalu mai ia i ka hale o kou pono ana. 7Ina ua uuku kou hoomaka ana i kinohou, O kou hopena, e mahuahua loa ana no ia.
8No ka mea, ke noi aku nei au ia oe, e ninau aku oe i ka hanauna mamua, A e hoomakaukau oe e noonoo i ko lakou poe makua: 9(No ka mea, inehinei wale no kakou, aohe ike, A o ko kakou mau la ma ka honua, he aka no ia:) 10Aole anei lakou e ao mai ia oe, a e hai mai ia oe, A e hoike mai i na olelo mailoko mai o ko lakou naau?
11E ulu anei ke papuro ke ole ka lepo poho? E ulu anei ka akaakai ke ole ka wai? 12I kona manawa uliuli, aole i okiia, Ua mae no ia mamua o na mauu e ae a pau. 13Pela no ka hope o ka poe a pau e hoopoina ana i ke Akua; A pela no ka manaolana o ka aia e make ai. 14O kona manaolana e okiia'ku ia, A o kona mea hilinai, he punawelewele no ia. 15E hilinai iho oia maluna o kona hale, aka, aole ia e paa: E hoopaa aku oia ia mea, aole nae ia e kupono. 16Ua uliuli oia imua o ka la, A kupu ae kona mau lala ma kona kihapai. 17Ua awiliia kona mau aa ma ka waikahe, A ike iho la ia i kahi o na pohaku. 18Aka, e hoopauia aku ia mea mai kona wahi aku, Alaila e hoole mai oia ia ia, aole au i ike ia oe. 19Aia hoi, oia ka olioli o kona aoao, A mailoko mai o ka lepo e kupu ae na mea e. 20Aia hoi, aole ke Akua e hoowahawaha i ka mea pono, Aole hoi ia e kokua aku i ka poe hana hewa: 21A hoopiha mai ia i kou waha i ka akaaka, A i kou lehelehe i ka hooho olioli. 22O ka poe inaina ia oe e hoaahuia lakou i ka hilahila: A e lilo ka hale o ka poe hewa i mea ole.