1NOLAILA ke noi aku nei au ia oe, e Ioba, e hoolohe mai i ka'u mau olelo, A e haliu mai i ka'u mau huaolelo a pau. 2Aia hoi, ano, ke wehe nei au i kuu waha, Ke olelo aku nei kuu elelo ma kuu waha. 3Ma ka pono o kuu naau ka'u olelo; A e olelo akaka kuu lehelehe i ka naauao. 4Na ka Uhane o ke Akua owau i hana, Na ka hanu hoi o ka Mea mana owau i hoola. 5Ina e hiki ia oe ke ekemu mai ia'u, E hooponopono oe imua o'u, e kupaa. 6Aia hoi, no ke Akua no wau e like me oe; Ua hanaia hoi au mai ka lepo mai. 7Aia hoi, aole ko'u makau e hooweliweli ia oe, Aole e hookaumahaia ko'u lima maluna ou.
8He oiaio, ua olelo mai oe maloko o kuu pepeiao, A ua lohe au i ka leo o kau mau olelo; 9Ua maemae wau, me ka hala ole, Ua maemae wau, aohe hewa iloko o'u. 10Aia hoi, ua imi no ia i na mea ku e ia'u, Ua manao mai ia ia'u he enemi nona; 11Ua hookomo no ia i kuu mau wawae ma ka laau kupee, Ua hoohalua no ia i ko'u mau aoao a pau. 12Aia hoi, ma keia ua pono ole oe; E olelo aku au ia oe, no ka mea, ua oi ke Akua mamua o ke kanaka.
13No ke aha la oe i hakaka pu ai me ia? No ka mea, aole ia i hoike mai i kana mau mea a pau.
14No ka mea, hookahi ka ke Akua olelo ana mai, A elua hoi, aole nae i manaoia oia. 15Ma ka moeuhane, ma ka hihio i ka po, I ke kau ana o ka hiamoe nui maluna o kanaka, I ka hiamoe ana maluna o kahi moe; 16Alaila wehe ae la ia i na pepeiao o kanaka, A hoopaa mai ia i ke ao ana o lakou, 17I hoololi ai ia i ka ke kanaka hana, A e hookaa i ke kiekie mai ke kanaka aku. 18Ua hoopakele no ia i kona uhane mai ka luakupapau mai, A i kona ola hoi mai ka make ana i ka pahikaua.
19Ua hoopaiia oia i ka eha maluna o kona wahi moe, A o ka haukeke o kona mau iwi, ua ikaika ia. 20Ua hoopailua kona naau i ka berena, A o kona uhane i ka ai maikai. 21Ua hoopauia kona io mai ka maka aku, A ua ahuwale mai kona mau iwi i ike ole ia. 22A ua hookokokeia kona uhane i ka luakupapau, A o kona ola i na mea hoopau.
23Ina me ia he anela, he hoikeolelo, Hookahi noloko mai o ke tausani, E hoike aku i ke kanaka i kona pono; 24A aloha mai oia ia ia, a i iho la, E hoopakele ia ia mai ka iho ana i ka lua; Ua loaa ia'u ka uku hoola. 25E hana hou ia kona io me ia i ka wa kamalii, E hoi hou no ia i na la o kona wa opio: 26E pule aku no ia i ke Akua, a e oluolu no oia ia ia: A e ike aku ia i kona maka me ka hauoli; A e hoihoi aku no ia no ke kanaka i kona pono. 27E nana mai no ia i na kanaka, A e olelo iho kekahi, Ua hewa au, A ua hookahuli au i ka pono, aole nae i hooukuia mai au; 28E hoopakele no ia i kona uhane mai ka hele ana i ka lua, A e ike kona mau maka i ka malamalama.
29Aia hoi, o keia mau mea a pau i hana pinepine ai ke Akua me ke kanaka, 30E hoihoi mai i kona uhane mai ka lua mai, E hoomalamalamaia i ka malamalama o ka poe e ola ana. 31E haliu mai oe, e Ioba, e hoolohe mai ia'u: E noho malie, a na'u e olelo aku. 32Ina he wahi mea, e ekemu mai oe ia'u, E olelo mai, no ka mea ke makemake nei au i kou hoaponoia. 33A i ole hoi, e hoolohe mai oe ia'u, E noho malie, a e ao aku au ia oe i ka noeau.