1Και ειδον επι την δεξιαν του καθημενου επι του θρονου βιβλιον γεγραμμενον εσωθεν και οπισθεν, κατεσφραγισμενον σφραγισιν επτα. 2και ειδον αγγελον ισχυρον κηρυσσοντα εν φωνῃ μεγαλῃ Τις αξιος ανοιξαι το βιβλιον και λυσαι τας σφραγιδας αυτου; 3και ουδεις εδυνατο εν τῳ ουρανῳ ουδε επι της γης ουδε υποκατω της γης ανοιξαι το βιβλιον ουτε βλεπειν αυτο. 4και εκλαιον πολυ, οτι ουδεις αξιος ευρεθη ανοιξαι το βιβλιον ουτε βλεπειν αυτο. 5και εις εκ των πρεσβυτερων λεγει μοι Μη κλαιε· ιδου ενικησεν ο Λεων ο εκ της φυλης Ιουδα, η Ριζα Δαυειδ, ανοιξαι το βιβλιον και τας επτα σφραγιδας αυτου. 6Και ειδον εν μεσῳ του θρονου και των τεσσαρων ζῳων και εν μεσῳ των πρεσβυτερων Αρνιον εστηκος ως εσφαγμενον, εχων κερατα επτα και οφθαλμους επτα, οι εισιν τα επτα Πνευματα του Θεου απεσταλμενοι εις πασαν την γην. 7και ηλθεν και ειληφεν εκ της δεξιας του καθημενου επι του θρονου. 8Και οτε ελαβεν το βιβλιον, τα τεσσερα ζῳα και οι εικοσι τεσσαρες πρεσβυτεροι επεσαν ενωπιον του Αρνιου, εχοντες εκαστος κιθαραν και φιαλας χρυσας γεμουσας θυμιαματων, αι εισιν αι προσευχαι των αγιων. 9και ᾳδουσιν ῳδην καινην λεγοντες Αξιος ει λαβειν το βιβλιον και ανοιξαι τας σφραγιδας αυτου, οτι εσφαγης και ηγορασας τῳ Θεῳ εν τῳ αιματι σου εκ πασης φυλης και γλωσσης και λαου και εθνους, 10και εποιησας αυτους τῳ Θεῳ ημων βασιλειαν και ιερεις, και βασιλευσουσιν επι της γης. 11και ειδον, και ηκουσα φωνην αγγελων πολλων κυκλῳ του θρονου και των ζῳων και των πρεσβυτερων, και ην ο αριθμος αυτων μυριαδες μυριαδων και χιλιαδες χιλιαδων, 12λεγοντες φωνῃ μεγαλῃ Αξιος εστιν το Αρνιον το εσφαγμενον λαβειν την δυναμιν και πλουτον και σοφιαν και ισχυν και τιμην και δοξαν και ευλογιαν. 13και παν κτισμα ο εν τῳ ουρανῳ και επι της γης και υποκατω της γης και επι της θαλασσης εστιν, και τα εν αυτοις παντα, ηκουσα λεγοντας Τῳ καθημενῳ επι τῳ θρονῳ και τῳ Αρνιῳ η ευλογια και η τιμη και η δοξα και το κρατος εις τους αιωνας των αιωνων. 14και τα τεσσερα ζῳα ελεγον Αμην, και οι πρεσβυτεροι επεσαν και προσεκυνησαν.