1και εδειξεν μοι ποταμον υδατος ζωης λαμπρον ως κρυσταλλον, εκπορευομενον εκ του θρονου του Θεου και του Αρνιου. 2εν μεσῳ της πλατειας αυτης και του ποταμου εντευθεν και εκειθεν ξυλον ζωης ποιουν καρπους δωδεκα, κατα μηνα εκαστον αποδιδουν τον καρπον αυτου, και τα φυλλα του ξυλου εις θεραπειαν των εθνων. 3και παν καταθεμα ουκ εσται ετι. και ο θρονος του Θεου και του Αρνιου εν αυτῃ εσται, και οι δουλοι αυτου λατρευσουσιν αυτῳ, 4και οψονται το προσωπον αυτου, και το ονομα αυτου επι των μετωπων αυτων. 5και νυξ ουκ εσται ετι, και ουκ εχουσιν χρειαν φωτος λυχνου και φωτος ηλιου, οτι Κυριος ο Θεος φωτισει επ αυτους, και βασιλευσουσιν εις τους αιωνας των αιωνων. 6Και ειπεν μοι Ουτοι οι λογοι πιστοι και αληθινοι, και ο Κυριος ο Θεος των πνευματων των προφητων απεστειλεν τον αγγελον αυτου δειξαι τοις δουλοις αυτου α δει γενεσθαι εν ταχει. 7και Ιδου ερχομαι ταχυ. μακαριος ο τηρων τους λογους της προφητειας του βιβλιου τουτου. 8Καγω Ιωανης ο ακουων και βλεπων ταυτα. και οτε ηκουσα και εβλεψα, επεσα προσκυνησαι εμπροσθεν των ποδων του αγγελου του δεικνυοντος μοι ταυτα. 9και λεγει μοι Ορα μη· συνδουλος σου ειμι και των αδελφων σου των προφητων και των τηρουντων τους λογους του βιβλιου τουτου· τῳ Θεῳ προσκυνησον. 10Και λεγει μοι Μη σφραγισῃς τους λογους της προφητειας του βιβλιου τουτου· ο καιρος γαρ εγγυς εστιν. 11ο αδικων αδικησατω ετι, και ο ρυπαρος ρυπανθητω ετι, και ο δικαιος δικαιοσυνην ποιησατω ετι, και ο αγιος αγιασθητω ετι. 12Ιδου ερχομαι ταχυ, και ο μισθος μου μετ εμου, αποδουναι εκαστῳ ως το εργον εστιν αυτου. 13εγω το Αλφα και το Ω, ο πρωτος και ο εσχατος, η αρχη και το τελος. 14μακαριοι οι πλυνοντες τας στολας αυτων, ινα εσται η εξουσια αυτων επι το ξυλον της ζωης και τοις πυλωσιν εισελθωσιν εις την πολιν. 15εξω οι κυνες και οι φαρμακοι και οι πορνοι και οι φονεις και οι ειδωλολατραι και πας φιλων και ποιων ψευδος. 16Εγω Ιησους επεμψα τον αγγελον μου μαρτυρησαι υμιν ταυτα επι ταις εκκλησιαις. εγω ειμι η ριζα και το γενος Δαυειδ, ο αστηρ ο λαμπρος, ο πρωινος. 17Και το Πνευμα και η νυμφη λεγουσιν Ερχου. και ο ακουων ειπατω Ερχου. και ο διψων ερχεσθω, ο θελων λαβετω υδωρ ζωης δωρεαν. 18Μαρτυρω εγω παντι τῳ ακουοντι τους λογους της προφητειας του βιβλιου τουτου· εαν τις επιθῃ επ αυτα, επιθησει ο Θεος επ αυτον τας πληγας τας γεγραμμενας εν τῳ βιβλιῳ τουτῳ· 19και εαν τις αφελῃ απο των λογων του βιβλιου της προφητειας ταυτης, αφελει ο Θεος το μερος αυτου απο του ξυλου της ζωης και εκ της πολεως της αγιας, των γεγραμμενων εν τῳ βιβλιῳ τουτῳ. 20Λεγει ο μαρτυρων ταυτα Ναι, ερχομαι ταχυ. Αμην, ερχου Κυριε Ιησου. 21Η χαρις του Κυριου Ιησου μετα παντων.