1Παυλος δεσμιος Χριστου Ιησου και Τιμοθεος ο αδελφος Φιλημονι τῳ αγαπητῳ και συνεργῳ ημων 2και Απφιᾳ τῃ αδελφῃ και Αρχιππῳ τῳ συστρατιωτῃ ημων και τῃ κατ οικον σου εκκλησιᾳ· 3χαρις υμιν και ειρηνη απο Θεου Πατρος ημων και Κυριου Ιησου Χριστου. 4Ευχαριστω τῳ Θεῳ μου παντοτε μνειαν σου ποιουμενος επι των προσευχων μου, 5ακουων σου την αγαπην και την πιστιν ην εχεις προς τον Κυριον Ιησουν και εις παντας τους αγιους, 6οπως η κοινωνια της πιστεως σου ενεργης γενηται εν επιγνωσει παντος αγαθου του εν ημιν εις Χριστον· 7χαραν γαρ πολλην εσχον και παρακλησιν επι τῃ αγαπῃ σου, οτι τα σπλαγχνα των αγιων αναπεπαυται δια σου, αδελφε. 8Διο, πολλην εν Χριστῳ παρρησιαν εχων επιτασσειν σοι το ανηκον, 9δια την αγαπην μαλλον παρακαλω, τοιουτος ων ως Παυλος πρεσβυτης νυνι δε και δεσμιος Χριστου Ιησου, 10παρακαλω σε περι του εμου τεκνου, ον εγεννησα εν τοις δεσμοις, Ονησιμον, 11τον ποτε σοι αχρηστον νυνι δε και σοι και εμοι ευχρηστον, 12ον ανεπεμψα σοι αυτον, τουτ εστιν τα εμα σπλαγχνα· 13ον εγω εβουλομην προς εμαυτον κατεχειν, ινα υπερ σου μοι διακονῃ εν τοις δεσμοις του ευαγγελιου, 14χωρις δε της σης γνωμης ουδεν ηθελησα ποιησαι, ινα μη ως κατα αναγκην το αγαθον σου ῃ αλλα κατα εκουσιον. 15ταχα γαρ δια τουτο εχωρισθη προς ωραν, ινα αιωνιον αυτον απεχῃς, 16ουκετι ως δουλον αλλα υπερ δουλον, αδελφον αγαπητον, μαλιστα εμοι, ποσῳ δε μαλλον σοι και εν σαρκι και εν Κυριῳ. 17ει ουν με εχεις κοινωνον, προσλαβου αυτον ως εμε. 18ει δε τι ηδικησεν σε η οφειλει, τουτο εμοι ελλογα· 19εγω Παυλος εγραψα τῃ εμῃ χειρι, εγω αποτισω· ινα μη λεγω σοι οτι και σεαυτον μοι προσοφειλεις. 20ναι, αδελφε, εγω σου οναιμην εν Κυριῳ· αναπαυσον μου τα σπλαγχνα εν Χριστῳ. 21Πεποιθως τῃ υπακοῃ σου εγραψα σοι, ειδως οτι και υπερ α λεγω ποιησεις. 22αμα δε και ετοιμαζε μοι ξενιαν· ελπιζω γαρ οτι δια των προσευχων υμων χαρισθησομαι υμιν. 23Ασπαζεται σε Επαφρας ο συναιχμαλωτος μου εν Χριστῳ Ιησου, 24Μαρκος, Αρισταρχος, Δημας, Λουκας, οι συνεργοι μου. 25Η χαρις του Κυριου Ιησου Χριστου μετα του πνευματος υμων.