1Τοτε ο Ιησους ανηχθη εις την ερημον υπο του Πνευματος, πειρασθηναι υπο του διαβολου. 2και νηστευσας ημερας τεσσερακοντα και τεσσερακοντα νυκτας υστερον επεινασεν. 3και προσελθων ο πειραζων ειπεν αυτῳ Ει Υιος ει του Θεου, ειπε ινα οι λιθοι ουτοι αρτοι γενωνται. 4ο δε αποκριθεις ειπεν Γεγραπται Ουκ επ αρτῳ μονῳ ζησεται ο ανθρωπος, αλλ επι παντι ρηματι εκπορευομενῳ δια στοματος Θεου. 5Τοτε παραλαμβανει αυτον ο διαβολος εις την αγιαν πολιν, και εστησεν αυτον επι το πτερυγιον του ιερου, 6και λεγει αυτῳ Ει Υιος ει του Θεου, βαλε σεαυτον κατω· γεγραπται γαρ οτι Τοις αγγελοις αυτου εντελειται περι σου και επι χειρων αρουσιν σε, μη ποτε προσκοψῃς προς λιθον τον ποδα σου. 7εφη αυτῳ ο Ιησους Παλιν γεγραπται Ουκ εκπειρασεις Κυριον τον Θεον σου. 8Παλιν παραλαμβανει αυτον ο διαβολος εις ορος υψηλον λιαν, και δεικνυσιν αυτῳ πασας τας βασιλειας του κοσμου και την δοξαν αυτων, 9και ειπεν αυτῳ Ταυτα σοι παντα δωσω, εαν πεσων προσκυνησῃς μοι. 10τοτε λεγει αυτῳ ο Ιησους Υπαγε, Σατανα· γεγραπται γαρ Κυριον τον θεον σου προσκυνησεις και αυτῳ μονῳ λατρευσεις. 11Τοτε αφιησιν αυτον ο διαβολος, και ιδου αγγελοι προσηλθον και διηκονουν αυτῳ. 12Ακουσας δε οτι Ιωανης παρεδοθη ανεχωρησεν εις την Γαλιλαιαν. 13και καταλιπων την Ναζαρα ελθων κατῳκησεν εις Καφαρναουμ την παραθαλασσιαν εν οριοις Ζαβουλων και Νεφθαλειμ· 14ινα πληρωθῃ το ρηθεν δια Ησαιου του προφητου λεγοντος 15Γη Ζαβουλων και γη Νεφθαλειμ, οδον θαλασσης, περαν του Ιορδανου, Γαλιλαια των εθνων, 16ο λαος ο καθημενος εν σκοτιᾳ φως ειδεν μεγα, και τοις καθημενοις εν χωρᾳ και σκιᾳ θανατου φως ανετειλεν αυτοις. 17Απο τοτε ηρξατο ο Ιησους κηρυσσειν και λεγειν Μετανοειτε, ηγγικεν γαρ η βασιλεια των ουρανων. 18Περιπατων δε παρα την θαλασσαν της Γαλιλαιας ειδεν δυο αδελφους, Σιμωνα τον λεγομενον Πετρον και Ανδρεαν τον αδελφον αυτου, βαλλοντας αμφιβληστρον εις την θαλασσαν· ησαν γαρ αλεεις. 19και λεγει αυτοις Δευτε οπισω μου, και ποιησω υμας αλεεις ανθρωπων. 20οι δε ευθεως αφεντες τα δικτυα ηκολουθησαν αυτῳ. 21Και προβας εκειθεν ειδεν αλλους δυο αδελφους, Ιακωβον τον του Ζεβεδαιου και Ιωανην τον αδελφον αυτου, εν τῳ πλοιῳ μετα Ζεβεδαιου του πατρος αυτων καταρτιζοντας τα δικτυα αυτων· και εκαλεσεν αυτους. 22οι δε ευθεως αφεντες το πλοιον και τον πατερα αυτων ηκολουθησαν αυτῳ. 23Και περιηγεν εν ολῃ τῃ Γαλιλαιᾳ, διδασκων εν ταις συναγωγαις αυτων και κηρυσσων το ευαγγελιον της βασιλειας και θεραπευων πασαν νοσον και πασαν μαλακιαν εν τῳ λαῳ. 24και απηλθεν η ακοη αυτου εις ολην την Συριαν· και προσηνεγκαν αυτῳ παντας τους κακως εχοντας ποικιλαις νοσοις και βασανοις συνεχομενους, δαιμονιζομενους και σεληνιαζομενους και παραλυτικους, και εθεραπευσεν αυτους. 25και ηκολουθησαν αυτῳ οχλοι πολλοι απο της Γαλιλαιας και Δεκαπολεως και Ιεροσολυμων και Ιουδαιας και περαν του Ιορδανου.