1Του δε Ιησου γεννηθεντος εν Βηθλεεμ της Ιουδαιας εν ημεραις Ηρῳδου του βασιλεως, ιδου μαγοι απο ανατολων παρεγενοντο εις Ιεροσολυμα 2λεγοντες Που εστιν ο τεχθεις βασιλευς των Ιουδαιων; ειδομεν γαρ αυτου τον αστερα εν τῃ ανατολῃ και ηλθομεν προσκυνησαι αυτῳ. 3ακουσας δε ο βασιλευς Ηρῳδης εταραχθη, και πασα Ιεροσολυμα μετ αυτου, 4και συναγαγων παντας τους αρχιερεις και γραμματεις του λαου επυνθανετο παρ αυτων που ο Χριστος γενναται. 5οι δε ειπαν αυτῳ· Εν Βηθλεεμ της Ιουδαιας· ουτως γαρ γεγραπται δια του προφητου· 6Και συ, Βηθλεεμ γη Ιουδα, ουδαμως ελαχιστη ει εν τοις ηγεμοσιν Ιουδα· εκ σου γαρ εξελευσεται ηγουμενος, οστις ποιμανει τον λαον μου τον Ισραηλ. 7Τοτε Ηρῳδης λαθρᾳ καλεσας τους μαγους ηκριβωσεν παρ αυτων τον χρονον του φαινομενου αστερος, 8και πεμψας αυτους εις Βηθλεεμ ειπεν· Πορευθεντες εξετασατε ακριβως περι του παιδιου· επαν δε ευρητε, απαγγειλατε μοι, οπως καγω ελθων προσκυνησω αυτῳ. 9οι δε ακουσαντες του βασιλεως επορευθησαν· και ιδου ο αστηρ, ον ειδον εν τῃ ανατολῃ, προηγεν αυτους εως ελθων εσταθη επανω ου ην το παιδιον. 10ιδοντες δε τον αστερα εχαρησαν χαραν μεγαλην σφοδρα. 11και ελθοντες εις την οικιαν ειδον το παιδιον μετα Μαριας της μητρος αυτου, και πεσοντες προσεκυνησαν αυτῳ, και ανοιξαντες τους θησαυρους αυτων προσηνεγκαν αυτῳ δωρα, χρυσον και λιβανον και σμυρναν. 12και χρηματισθεντες κατ οναρ μη ανακαμψαι προς Ηρῳδην, δι αλλης οδου ανεχωρησαν εις την χωραν αυτων. 13Αναχωρησαντων δε αυτων, ιδου αγγελος κυριου φαινεται κατ οναρ τῳ Ιωσηφ λεγων Εγερθεις παραλαβε το παιδιον και την μητερα αυτου και φευγε εις Αιγυπτον, και ισθι εκει εως αν ειπω σοι· μελλει γαρ Ηρῳδης ζητειν το παιδιον του απολεσαι αυτο. 14ο δε εγερθεις παρελαβεν το παιδιον και την μητερα αυτου νυκτος και ανεχωρησεν εις Αιγυπτον, 15και ην εκει εως της τελευτης Ηρῳδου· ινα πληρωθῃ το ρηθεν υπο κυριου δια του προφητου λεγοντος Εξ Αιγυπτου εκαλεσα τον υιον μου. 16Τοτε Ηρῳδης ιδων οτι ενεπαιχθη υπο των μαγων εθυμωθη λιαν, και αποστειλας ανειλεν παντας τους παιδας τους εν Βηθλεεμ και εν πασι τοις οριοις αυτης απο διετους και κατωτερω, κατα τον χρονον ον ηκριβωσεν παρα των μαγων. 17τοτε επληρωθη το ρηθεν δια Ιερεμιου του προφητου λεγοντος 18Φωνη εν Ραμα ηκουσθη, κλαυθμος και οδυρμος πολυς· Ραχηλ κλαιουσα τα τεκνα αυτης, και ουκ ηθελεν παρακληθηναι οτι ουκ εισιν. 19Τελευτησαντος δε του Ηρῳδου, ιδου αγγελος Κυριου φαινεται κατ οναρ τῳ Ιωσηφ εν Αιγυπτῳ 20λεγων Εγερθεις παραλαβε το παιδιον και την μητερα αυτου και πορευου εις γην Ισραηλ· τεθνηκασιν γαρ οι ζητουντες την ψυχην του παιδιου. 21ο δε εγερθεις παρελαβεν το παιδιον και την μητερα αυτου και εισηλθεν εις γην Ισραηλ. 22ακουσας δε οτι Αρχελαος βασιλευει της Ιουδαιας αντι του πατρος αυτου Ηρῳδου εφοβηθη εκει απελθειν· χρηματισθεις δε κατ οναρ ανεχωρησεν εις τα μερη της Γαλιλαιας, 23και ελθων κατῳκησεν εις πολιν λεγομενην Ναζαρετ· οπως πληρωθῃ το ρηθεν δια των προφητων οτι Ναζωραιος κληθησεται.