1Αρχη του ευαγγελιου Ιησου Χριστου . 2Καθως γεγραπται εν τῳ Ησαιᾳ τῳ προφητῃ Ιδου αποστελλω τον αγγελον μου προ προσωπου σου, ος κατασκευασει την οδον σου· 3φωνη βοωντος εν τῃ ερημῳ Ετοιμασατε την οδον Κυριου, ευθειας ποιειτε τας τριβους αυτου, 4εγενετο Ιωανης ο βαπτιζων εν τῃ ερημῳ κηρυσσων βαπτισμα μετανοιας εις αφεσιν αμαρτιων. 5και εξεπορευετο προς αυτον πασα η Ιουδαια χωρα και οι Ιεροσολυμειται παντες, και εβαπτιζοντο υπ αυτου εν τῳ Ιορδανῃ ποταμῳ εξομολογουμενοι τας αμαρτιας αυτων. 6και ην ο Ιωανης ενδεδυμενος τριχας καμηλου και ζωνην δερματινην περι την οσφυν αυτου, και εσθων ακριδας και μελι αγριον. 7και εκηρυσσεν λεγων Ερχεται ο ισχυροτερος μου οπισω μου, ου ουκ ειμι ικανος κυψας λυσαι τον ιμαντα των υποδηματων αυτου. 8εγω εβαπτισα υμας υδατι, αυτος δε βαπτισει υμας Πνευματι Αγιῳ. 9Και εγενετο εν εκειναις ταις ημεραις ηλθεν Ιησους απο Ναζαρετ της Γαλιλαιας και εβαπτισθη εις τον Ιορδανην υπο Ιωανου. 10και ευθυς αναβαινων εκ του υδατος ειδεν σχιζομενους τους ουρανους και το Πνευμα ως περιστεραν καταβαινον εις αυτον· 11και φωνη εγενετο εκ των ουρανων Συ ει ο Υιος μου ο αγαπητος, εν σοι ευδοκησα. 12Και ευθυς το Πνευμα αυτον εκβαλλει εις την ερημον. 13και ην εν τῃ ερημῳ τεσσερακοντα ημερας πειραζομενος υπο του Σατανα, και ην μετα των θηριων, και οι αγγελοι διηκονουν αυτῳ. 14Και μετα το παραδοθηναι τον Ιωανην ηλθεν ο Ιησους εις την Γαλιλαιαν κηρυσσων το ευαγγελιον του Θεου 15και λεγων οτι Πεπληρωται ο καιρος και ηγγικεν η βασιλεια του Θεου· μετανοειτε και πιστευετε εν τῳ ευαγγελιῳ. 16Και παραγων παρα την θαλασσαν της Γαλιλαιας ειδεν Σιμωνα και Ανδρεαν τον αδελφον Σιμωνος αμφιβαλλοντας εν τῃ θαλασσῃ· ησαν γαρ αλεεις. 17και ειπεν αυτοις ο Ιησους Δευτε οπισω μου, και ποιησω υμας γενεσθαι αλεεις ανθρωπων. 18και ευθυς αφεντες τα δικτυα ηκολουθησαν αυτῳ. 19Και προβας ολιγον ειδεν Ιακωβον τον του Ζεβεδαιου και Ιωανην τον αδελφον αυτου, και αυτους εν τῳ πλοιῳ καταρτιζοντας τα δικτυα, 20και ευθυς εκαλεσεν αυτους· και αφεντες τον πατερα αυτων Ζεβεδαιον εν τῳ πλοιῳ μετα των μισθωτων απηλθον οπισω αυτου. 21Και εισπορευονται εις Καφαρναουμ· και ευθυς τοις σαββασιν εισελθων εις την συναγωγην εδιδασκεν. 22και εξεπλησσοντο επι τῃ διδαχῃ αυτου· ην γαρ διδασκων αυτους ως εξουσιαν εχων, και ουχ ως οι γραμματεις. 23Και ευθυς ην εν τῃ συναγωγῃ αυτων ανθρωπος εν πνευματι ακαθαρτῳ, και ανεκραξεν 24λεγων Τι ημιν και σοι, Ιησου Ναζαρηνε; ηλθες απολεσαι ημας. οιδα σε τις ει, ο Αγιος του Θεου. 25και επετιμησεν αυτῳ ο Ιησους Φιμωθητι και εξελθε εξ αυτου. 26και σπαραξαν αυτον το πνευμα το ακαθαρτον και φωνησαν φωνῃ μεγαλῃ εξηλθεν εξ αυτου. 27και εθαμβηθησαν απαντες, ωστε συνζητειν αυτους λεγοντας Τι εστιν τουτο; διδαχη καινη κατ εξουσιαν· και τοις πνευμασι τοις ακαθαρτοις επιτασσει, και υπακουουσιν αυτῳ. 28και εξηλθεν η ακοη αυτου ευθυς πανταχου εις ολην την περιχωρον της Γαλιλαιας. 29Και ευθυς εκ της συναγωγης εξελθοντες ηλθον εις την οικιαν Σιμωνος και Ανδρεου μετα Ιακωβου και Ιωανου. 30η δε πενθερα Σιμωνος κατεκειτο πυρεσσουσα, και ευθυς λεγουσιν αυτῳ περι αυτης. 31και προσελθων ηγειρεν αυτην κρατησας της χειρος· και αφηκεν αυτην ο πυρετος, και διηκονει αυτοις. 32Οψιας δε γενομενης, οτε εδυσεν ο ηλιος, εφερον προς αυτον παντας τους κακως εχοντας και τους δαιμονιζομενους· 33και ην ολη η πολις επισυνηγμενη προς την θυραν. 34και εθεραπευσεν πολλους κακως εχοντας ποικιλαις νοσοις, και δαιμονια πολλα εξεβαλεν, και ουκ ηφιεν λαλειν τα δαιμονια, οτι ῃδεισαν αυτον. 35Και πρωι εννυχα λιαν αναστας εξηλθεν και απηλθεν εις ερημον τοπον, κακει προσηυχετο. 36και κατεδιωξεν αυτον Σιμων και οι μετ αυτου, 37και ευρον αυτον και λεγουσιν αυτῳ οτι Παντες ζητουσιν σε. 38και λεγει αυτοις· Αγωμεν αλλαχου εις τας εχομενας κωμοπολεις, ινα και εκει κηρυξω· εις τουτο γαρ εξηλθον. 39και ηλθεν κηρυσσων εις τας συναγωγας αυτων εις ολην την Γαλιλαιαν και τα δαιμονια εκβαλλων. 40Και ερχεται προς αυτον λεπρος παρακαλων αυτον και γονυπετων λεγων αυτῳ οτι Εαν θελῃς δυνασαι με καθαρισαι. 41και σπλαγχνισθεις εκτεινας την χειρα αυτου ηψατο και λεγει αυτῳ Θελω, καθαρισθητι. 42και ευθυς απηλθεν απ αυτου η λεπρα, και εκαθερισθη. 43και εμβριμησαμενος αυτῳ ευθυς εξεβαλεν αυτον, 44και λεγει αυτῳ Ορα μηδενι μηδεν ειπῃς, αλλα υπαγε σεαυτον δειξον τῳ ιερει και προσενεγκε περι του καθαρισμου σου α προσεταξεν Μωυσης εις μαρτυριον αυτοις. 45ο δε εξελθων ηρξατο κηρυσσειν πολλα και διαφημιζειν τον λογον, ωστε μηκετι αυτον δυνασθαι φανερως εις πολιν εισελθειν, αλλ εξω επ ερημοις τοποις ην· και ηρχοντο προς αυτον παντοθεν.