1και υμας οντας νεκρους τοις παραπτωμασιν και ταις αμαρτιαις υμων, 2εν αις ποτε περιεπατησατε κατα τον αιωνα του κοσμου τουτου, κατα τον αρχοντα της εξουσιας του αερος, του πνευματος του νυν ενεργουντος εν τοις υιοις της απειθειας· 3εν οις και ημεις παντες ανεστραφημεν ποτε εν ταις επιθυμιαις της σαρκος ημων, ποιουντες τα θεληματα της σαρκος και των διανοιων, και ημεθα τεκνα φυσει οργης ως και οι λοιποι· 4ο δε Θεος πλουσιος ων εν ελεει, δια την πολλην αγαπην αυτου ην ηγαπησεν ημας, 5και οντας ημας νεκρους τοις παραπτωμασιν συνεζωοποιησεν τῳ Χριστῳ,— χαριτι εστε σεσῳσμενοι,— 6και συνηγειρεν και συνεκαθισεν εν τοις επουρανιοις εν Χριστῳ Ιησου, 7ινα ενδειξηται εν τοις αιωσιν τοις επερχομενοις το υπερβαλλον πλουτος της χαριτος αυτου εν χρηστοτητι εφ ημας εν Χριστῳ Ιησου. 8τῃ γαρ χαριτι εστε σεσῳσμενοι δια πιστεως· και τουτο ουκ εξ υμων, Θεου το δωρον· 9ουκ εξ εργων, ινα μη τις καυχησηται. 10αυτου γαρ εσμεν ποιημα, κτισθεντες εν Χριστῳ Ιησου επι εργοις αγαθοις, οις προητοιμασεν ο Θεος ινα εν αυτοις περιπατησωμεν. 11Διο μνημονευετε οτι ποτε υμεις τα εθνη εν σαρκι, οι λεγομενοι ακροβυστια υπο της λεγομενης περιτομης εν σαρκι χειροποιητου, 12οτι ητε τῳ καιρῳ εκεινῳ χωρις Χριστου, απηλλοτριωμενοι της πολιτειας του Ισραηλ και ξενοι των διαθηκων της επαγγελιας, ελπιδα μη εχοντες και αθεοι εν τῳ κοσμῳ. 13νυνι δε εν Χριστῳ Ιησου υμεις οι ποτε οντες μακραν εγενηθητε εγγυς εν τῳ αιματι του Χριστου. 14Αυτος γαρ εστιν η ειρηνη ημων, ο ποιησας τα αμφοτερα εν και το μεσοτοιχον του φραγμου λυσας, την εχθραν, εν τῃ σαρκι αυτου 15τον νομον των εντολων εν δογμασιν καταργησας, ινα τους δυο κτισῃ εν αυτῳ εις ενα καινον ανθρωπον ποιων ειρηνην, 16και αποκαταλλαξῃ τους αμφοτερους εν ενι σωματι τῳ Θεῳ δια του σταυρου, αποκτεινας την εχθραν εν αυτῳ· 17και ελθων ευηγγελισατο ειρηνην υμιν τοις μακραν και ειρηνην τοις εγγυς· 18οτι δι αυτου εχομεν την προσαγωγην οι αμφοτεροι εν ενι Πνευματι προς τον Πατερα. 19αρα ουν ουκετι εστε ξενοι και παροικοι, αλλα εστε συνπολιται των αγιων και οικειοι του Θεου, 20εποικοδομηθεντες επι τῳ θεμελιῳ των αποστολων και προφητων, οντος ακρογωνιαιου αυτου Χριστου Ιησου, 21εν ῳ πασα οικοδομη συναρμολογουμενη αυξει εις ναον αγιον εν Κυριῳ, 22εν ῳ και υμεις συνοικοδομεισθε εις κατοικητηριον του Θεου εν Πνευματι.