1Παυλος αποστολος Χριστου Ιησου δια θεληματος Θεου τοις αγιοις τοις ουσιν [εν Εφεσῳ] και πιστοις εν Χριστῳ Ιησου· 2χαρις υμιν και ειρηνη απο Θεου Πατρος ημων και Κυριου Ιησου Χριστου. 3Ευλογητος ο Θεος και Πατηρ του Κυριου ημων Ιησου Χριστου, ο ευλογησας ημας εν πασῃ ευλογιᾳ πνευματικῃ εν τοις επουρανιοις εν Χριστῳ, 4καθως εξελεξατο ημας εν αυτῳ προ καταβολης κοσμου, ειναι ημας αγιους και αμωμους κατενωπιον αυτου, εν αγαπῃ 5προορισας ημας εις υιοθεσιαν δια Ιησου Χριστου εις αυτον, κατα την ευδοκιαν του θεληματος αυτου, 6εις επαινον δοξης της χαριτος αυτου ης εχαριτωσεν ημας εν τῳ Ηγαπημενῳ, 7εν ῳ εχομεν την απολυτρωσιν δια του αιματος αυτου, την αφεσιν των παραπτωματων, κατα το πλουτος της χαριτος αυτου 8ης επερισσευσεν εις ημας εν πασῃ σοφιᾳ και φρονησει 9γνωρισας ημιν το μυστηριον του θεληματος αυτου, κατα την ευδοκιαν αυτου, ην προεθετο εν αυτῳ 10εις οικονομιαν του πληρωματος των καιρων, ανακεφαλαιωσασθαι τα παντα εν τῳ Χριστῳ, τα επι τοις ουρανοις και τα επι της γης· εν αυτῳ, 11εν ῳ και εκληρωθημεν προορισθεντες κατα προθεσιν του τα παντα ενεργουντος κατα την βουλην του θεληματος αυτου, 12εις το ειναι ημας εις επαινον δοξης αυτου τους προηλπικοτας εν τῳ Χριστῳ· 13εν ῳ και υμεις, ακουσαντες τον λογον της αληθειας, το ευαγγελιον της σωτηριας υμων, εν ῳ και πιστευσαντες εσφραγισθητε τῳ Πνευματι της επαγγελιας τῳ Αγιῳ, 14ος εστιν αρραβων της κληρονομιας ημων, εις απολυτρωσιν της περιποιησεως, εις επαινον της δοξης αυτου. 15Δια τουτο καγω, ακουσας την καθ υμας πιστιν εν τῳ Κυριῳ Ιησου και την αγαπην την εις παντας τους αγιους, 16ου παυομαι ευχαριστων υπερ υμων μνειαν ποιουμενος επι των προσευχων μου, 17ινα ο Θεος του Κυριου ημων Ιησου Χριστου, ο Πατηρ της δοξης, δωῃ υμιν πνευμα σοφιας και αποκαλυψεως εν επιγνωσει αυτου, 18πεφωτισμενους τους οφθαλμους της καρδιας υμων, εις το ειδεναι υμας τις εστιν η ελπις της κλησεως αυτου, τις ο πλουτος της δοξης της κληρονομιας αυτου εν τοις αγιοις, 19και τι το υπερβαλλον μεγεθος της δυναμεως αυτου εις ημας τους πιστευοντας κατα την ενεργειαν του κρατους της ισχυος αυτου, 20ην ενηργηκεν εν τῳ Χριστῳ εγειρας αυτον εκ νεκρων, και καθισας εν δεξιᾳ αυτου εν τοις επουρανιοις 21υπερανω πασης αρχης και εξουσιας και δυναμεως και κυριοτητος και παντος ονοματος ονομαζομενου ου μονον εν τῳ αιωνι τουτῳ αλλα και εν τῳ μελλοντι· 22και παντα υπεταξεν υπο τους ποδας αυτου, και αυτον εδωκεν κεφαλην υπερ παντα τῃ εκκλησιᾳ, 23ητις εστιν το σωμα αυτου, το πληρωμα του τα παντα εν πασιν πληρουμενου.