1Ερωτωμεν δε υμας, αδελφοι, υπερ της παρουσιας του Κυριου ημων Ιησου Χριστου και ημων επισυναγωγης επ αυτον, 2εις το μη ταχεως σαλευθηναι υμας απο του νοος μηδε θροεισθαι μητε δια πνευματος μητε δια λογου μητε δι επιστολης ως δι ημων, ως οτι ενεστηκεν η ημερα του Κυριου. 3μη τις υμας εξαπατησῃ κατα μηδενα τροπον· οτι εαν μη ελθῃ η αποστασια πρωτον και αποκαλυφθῃ ο ανθρωπος της ανομιας, ο υιος της απωλειας, 4ο αντικειμενος και υπεραιρομενος επι παντα λεγομενον Θεον η σεβασμα, ωστε αυτον εις τον ναον του Θεου καθισαι, αποδεικνυντα εαυτον οτι εστιν Θεος. 5Ου μνημονευετε οτι ετι ων προς υμας ταυτα ελεγον υμιν; 6και νυν το κατεχον οιδατε, εις το αποκαλυφθηναι αυτον εν τῳ αυτου καιρῳ. 7το γαρ μυστηριον ηδη ενεργειται της ανομιας· μονον ο κατεχων αρτι εως εκ μεσου γενηται. 8και τοτε αποκαλυφθησεται ο ανομος, ον ο Κυριος Ιησους ανελει τῳ πνευματι του στοματος αυτου και καταργησει τῃ επιφανειᾳ της παρουσιας αυτου, 9ου εστιν η παρουσια κατ ενεργειαν του Σατανα εν πασῃ δυναμει και σημειοις και τερασιν ψευδους 10και εν πασῃ απατῃ αδικιας τοις απολλυμενοις, ανθ ων την αγαπην της αληθειας ουκ εδεξαντο εις το σωθηναι αυτους. 11και δια τουτο πεμπει αυτοις ο Θεος ενεργειαν πλανης εις το πιστευσαι αυτους τῳ ψευδει, 12ινα κριθωσιν παντες οι μη πιστευσαντες τῃ αληθειᾳ αλλα ευδοκησαντες τῃ αδικιᾳ. 13Ημεις δε οφειλομεν ευχαριστειν τῳ Θεῳ παντοτε περι υμων, αδελφοι ηγαπημενοι υπο Κυριου, οτι ειλατο υμας ο Θεος απ αρχης εις σωτηριαν εν αγιασμῳ Πνευματος και πιστει αληθειας, 14εις ο και εκαλεσεν υμας δια του ευαγγελιου ημων, εις περιποιησιν δοξης του Κυριου ημων Ιησου Χριστου. 15Αρα ουν, αδελφοι, στηκετε, και κρατειτε τας παραδοσεις ας εδιδαχθητε ειτε δια λογου ειτε δι επιστολης ημων. 16Αυτος δε ο Κυριος ημων Ιησους Χριστος και ο Θεος ο Πατηρ ημων, ο αγαπησας ημας και δους παρακλησιν αιωνιαν και ελπιδα αγαθην εν χαριτι, 17παρακαλεσαι υμων τας καρδιας και στηριξαι εν παντι εργῳ και λογῳ αγαθῳ.