1Παυλος αποστολος Χριστου Ιησου κατ επιταγην Θεου Σωτηρος ημων και Χριστου Ιησου της ελπιδος ημων 2Τιμοθεῳ γνησιῳ τεκνῳ εν πιστει· χαρις, ελεος, ειρηνη απο Θεου πατρος και Χριστου Ιησου του κυριου ημων. 3Καθως παρεκαλεσα σε προσμειναι εν Εφεσῳ, πορευομενος εις Μακεδονιαν, ινα παραγγειλῃς τισιν μη ετεροδιδασκαλειν 4μηδε προσεχειν μυθοις και γενεαλογιαις απεραντοις, αιτινες εκζητησεις παρεχουσιν μαλλον η οικονομιαν Θεου την εν πιστει· 5το δε τελος της παραγγελιας εστιν αγαπη εκ καθαρας καρδιας και συνειδησεως αγαθης και πιστεως ανυποκριτου, 6ων τινες αστοχησαντες εξετραπησαν εις ματαιολογιαν, 7θελοντες ειναι νομοδιδασκαλοι, μη νοουντες μητε α λεγουσιν μητε περι τινων διαβεβαιουνται. 8Οιδαμεν δε οτι καλος ο νομος, εαν τις αυτῳ νομιμως χρηται, 9ειδως τουτο, οτι δικαιῳ νομος ου κειται, ανομοις δε και ανυποτακτοις, ασεβεσι και αμαρτωλοις, ανοσιοις και βεβηλοις, πατρολῳαις και μητρολῳαις, ανδροφονοις, 10πορνοις, αρσενοκοιταις, ανδραποδισταις, ψευσταις, επιορκοις, και ει τι ετερον τῃ υγιαινουσῃ διδασκαλιᾳ αντικειται, 11κατα το ευαγγελιον της δοξης του μακαριου Θεου, ο επιστευθην εγω. 12Χαριν εχω τῳ ενδυναμωσαντι με Χριστῳ Ιησου τῳ Κυριῳ ημων, οτι πιστον με ηγησατο θεμενος εις διακονιαν, 13το προτερον οντα βλασφημον και διωκτην και υβριστην· αλλα ηλεηθην, οτι αγνοων εποιησα εν απιστιᾳ, 14υπερεπλεονασεν δε η χαρις του Κυριου ημων μετα πιστεως και αγαπης της εν Χριστῳ Ιησου. 15πιστος ο λογος και πασης αποδοχης αξιος, οτι Χριστος Ιησους ηλθεν εις τον κοσμον αμαρτωλους σωσαι· ων πρωτος ειμι εγω· 16αλλα δια τουτο ηλεηθην, ινα εν εμοι πρωτῳ ενδειξηται Ιησους Χριστος την απασαν μακροθυμιαν, προς υποτυπωσιν των μελλοντων πιστευειν επ' αυτῳ εις ζωην αιωνιον. 17Τῳ δε Βασιλει των αιωνων, αφθαρτῳ αορατῳ μονῳ Θεῳ, τιμη και δοξα εις τους αιωνας των αιωνων· αμην. 18Ταυτην την παραγγελιαν παρατιθεμαι σοι, τεκνον Τιμοθεε, κατα τας προαγουσας επι σε προφητειας, ινα στρατευῃ εν αυταις την καλην στρατειαν, 19εχων πιστιν και αγαθην συνειδησιν, ην τινες απωσαμενοι περι την πιστιν εναυαγησαν· 20ων εστιν Υμεναιος και Αλεξανδρος, ους παρεδωκα τῳ Σατανᾳ, ινα παιδευθωσιν μη βλασφημειν.