1ወነበቦ ፡ እግዚአብሔር ፡ ለሙሴ ፡ ወይቤሎ ፤
2ንግሮ ፡ ለአሮን ፡ ወበሎ ፡ እምነ ፡ መንገለ ፡ ገቦሃ ፡ ዘገ[ጻ] ፡ አንብር ፡ መኃትዊሃ ፡ ለመራናት ፡ ወአኅትዎን ፡ ሰብዑሆን ፡ መኃትዊሃ ።
3ወገብረ ፡ ከማሁ ፡ አሮን ፡ እምአሐዱ ፡ ገቦሃ ፡ ዘመንገለ ፡ ገ[ጻ] ፡ ለመራናት ፡ አሕተወ ፡ መኃትዊሃ ፡ በከመ ፡ አዘዞ ፡ እግዚአብሔር ፡ ለሙሴ ።
4ወከመዝ ፡ ውእቱ ፡ ግብረታ ፡ ለመራናት ፡ ወአዕጹቂሃኒ ፡ ጽኑዓን ፡ ዘወርቅ ፡ ኵለንታሆሙ ፡ ወ[ጽጌ] ያቲሃኒ ፡ ጽኑዕ ፡ ኵለንታሁ ፡ በከመ ፡ አርአያ ፡ ዘአርአዮ ፡ እግዚአብሔር ፡ ለሙሴ ፡ ከማሁ ፡ ገብራ ፡ ለመራናት ።
5ወነበቦ ፡ እግዚአብሔር ፡ ለሙሴ ፡ ወይቤሎ ፤
6ንሥኦሙ ፡ ለሌዋውያን ፡ እምነ ፡ ማእከሎሙ ፡ ለደቂቀ ፡ እስራኤል ፡ ወአንጽሖሙ ።
7ወከመዝ ፡ ትገብር ፡ ከመ ፡ ታንጽሖሙ ፡ ትነዝኆሙ ፡ ማየ ፡ አንጽሖ ፡ ወይላጽዩ ፡ ኵሎ ፡ ሥጋሆሙ ፡ ወይሕፅቡ ፡ አልባሲሆሙ ፡ ወንጹሓነ ፡ ይከውኑ ።
8ወይንሥኡ ፡ ላህመ ፡ አሐደ ፡ እምውስተ ፡ አልህምት ፡ ወሎቱኒ ፡ መሥዋዕተ ፡ ስንዳሌ ፡ ዘግበር ፡ በቅብእ ፡ ወላህም ፡ ዘዓመት ፡ እምውስተ ፡ አልህምት ፡ ይንሥኡ ፡ ዘበእንተ ፡ ኀጢአት ።
9ወታመጽኦሙ ፡ ለሌዋውያን ፡ ቅድመ ፡ ደብተራ ፡ ዘመርጡል ፡ ወታስተጋብእ ፡ ኵሎ ፡ ተዓይኒሆሙ ፡ ለደቂቀ ፡ እስራኤል ።
10ወታመጽኦሙ ፡ ለሌዋውያን ፡ ቅድመ ፡ እግዚአብሔር ፡ ወይወድዩ ፡ እደዊሆሙ ፡ ደቂቀ ፡ እስራኤል ፡ ላዕለ ፡ ሌዋውያን ።
11ወይፈልጦሙ ፡ አሮን ፡ ለሌዋውያን ፡ ቅድመ ፡ እግዚአብሔር ፡ እምውስተ ፡ ደቂቀ ፡ እስራኤል ፡ ወይከውኑ ፡ ለግብረ ፡ እግዚአብሔር ፡ እለ ፡ ይገብሩ ።
12ወሌዋውያን ፡ ይወድዩ ፡ እደዊሆሙ ፡ ዲበ ፡ አርእስተ ፡ አልህምት ፡ ወይገብር ፡ አሐደ ፡ በእንተ ፡ ኀጢአት ፡ ወአሐደ ፡ ለመሥዋዕተ ፡ እግዚአብሔር ፡ ወያስተሰሪ ፡ በእንቲአሆሙ ።
13ወታቀውሞሙ ፡ ለሌዋውያን ፡ ቅድመ ፡ እግዚአብሔር ፡ ወቅድመ ፡ አሮን ፡ ወቅድመ ፡ ደቂቁ ፡ ወታገብኦሙ ፡ ሀብቶ ፡ ለእግዚአብሔር ።
14ወትፈልጦሙ ፡ ለሌዋውያን ፡ እምነ ፡ ማእከሎሙ ፡ ለደቂቀ ፡ እስራኤል ፡ ወይከውኑ ፡ ሊተ ።
15ወእምድኅረ ፡ ዝንቱ ፡ ይበውኡ ፡ ሌዋውያን ፡ ይግበሩ ፡ ግብረ ፡ ደብተራ ፡ ዘመርጡል ፡ ወታነጽሖሙ ፡ ወታገብኦሙ ፡ ቅድመ ፡ እግዚአብሔር ።
16እስመ ፡ ሀብተ ፡ ገብኡ ፡ ሊተ ፡ እሙንቱ ፡ እምነ ፡ ማእከሎሙ ፡ ለደቂቀ ፡ እስራኤል ፡ ህየንተ ፡ ኵሉ ፡ ዘይፈትሕ ፡ ማኅፀነ ፡ ዘእምኵሉ ፡ በኵሮሙ ፡ ለደቂቀ ፡ እስራኤል ፡ ነሣእክዎሙ ፡ ሊተ ።
17እስመ ፡ ሊተ ፡ ውእቱ ፡ ኵሉ ፡ በኵር ፡ ዘእምደቂቀ ፡ እስራኤል ፡ እምነ ፡ ሰብኡ ፡ እስከ ፡ እንስሳሁ ፤
18በዕለት ፡ እንተ ፡ ባቲ ፡ ቀተልክዎሙ ፡ ለኵሉ ፡ በኵር ፡ ዘውስተ ፡ ምድረ ፡ ግብጽ ፡ ዘቀደስክዎሙ ፡ ሊተ ።
19ወነሣእክዎሙ ፡ ለሌዋውያን ፡ ህየንተ ፡ ኵሉ ፡ በኵር ፡ ዘእምደቂቀ ፡ እስራኤል ።
20ወአግባእክዎሙ ፡ ለሌዋውያን ፡ ሀብተ ፡ ወተውህቡ ፡ ለአሮን ፡ ወለደቂቁ ፡ እምነ ፡ ማእከሎሙ ፡ ለደቂቀ ፡ እስራኤል ፡ ከመ ፡ ይግበሩ ፡ ግብሮሙ ፡ ለደቂቀ ፡ እስራኤል ፡ በውስተ ፡ ደብተራ ፡ ዘመርጡል ፡ ወያስተሰርዩ ፡ በእንቲአሆሙ ፡ ለደቂቀ ፡ እስራኤል ፡ ወአልቦቱ ፡ እምውስተ ፡ ደቂቀ ፡ እስራኤል ፡ ዘይቀርብ ፡ ኀበ ፡ ቅድሳት ፡ እምደቂቀ ፡ እስራኤል ።
21ወገብሩ ፡ ሙሴ ፡ ወአሮን ፡ ወኵሉ ፡ ተዓይኒሆሙ ፡ ለደቂቀ ፡ እስራኤል ፡ ላዕለ ፡ ሌዋውያን ፡ በከመ ፡ አዘሆ ፡ እግዚአብሔር ፡ በእንተ ፡ ሌዋውያን ፡ ከማሁ ፡ ገብሩ ፡ ሎሙ ፡ ደቂቀ ፡ እስራኤል ።
22ወአንጹሑ ፡ ርእሶሙ ፡ ሌዋውያን ፡ ወኀፀቡ ፡ አልባሲሆሙ ፡ ወአግብእዎሙ ፡ ኀበ ፡ አሮን ፡ ሀብ[ተ] ፡ ቅድመ ፡ እግዚአብሔር ፡ ወአስተስረየ ፡ በእንቲአሆሙ ፡ አሮን ፡ ከመ ፡ ያንጽሖሙ ።
23ወእምድኅረ ፡ ዝንቱ ፡ ቦኡ ፡ ሌዋውያን ፡ ይግበሩ ፡ ግብሮሙ ፡ ውስተ ፡ ደብተራ ፡ ዘመርጡል ፡ ቅድመ ፡ አሮን ፡ ወቅድመ ፡ ደቂቁ ፡ በከመ ፡ አዘዞ ፡ እግዚአብሔር ፡ ለሙሴ ፡ በእንተ ፡ ሌዋውያን ፡ ከማሁ ፡ ገብሩ ፡ ሎሙ ።
24ወነበቦ ፡ እግዚአብሔር ፡ ለሙሴ ፡ ወይቤሎ ፤
25ዝንቱ ፡ ውእቱ ፡ ዘበእንተ ፡ ሌዋውያን ፡ ዘእምዕሥራ ፡ ወኀምስቱ ፡ ዓም ፡ ወላዕሉ ፡ እምኔሁ ፡ ይበውኡ ፡ ይግበሩ ፡ ግብሮሙ ፡ ግብረ ፡ ደብተራ ፡ ዘመርጡል ።
26ወዘእምኀምሳ ፡ ይሰዐር ፡ እምግብሩ ፡ ወኢይትቀነይ ፡ እንከ ፡ ውእቱ ። ወይትለአ[ክ] ፡ እኁሁ ፡ ውስተ ፡ ደብተራ ፡ ዘመርጡል ፡ ወይዕቀብ ፡ ሕቢቶሙ ፡ ወተቀንዮ ፡ ባሕቱ ፡ [ኢ]ይትቀነዩ ፡ ወከመዝ ፡ ትገብር ፡ ሎሙ ፡ ለሌዋውያን ፡ በበ ፡ ሕቢቶሙ ።