1ወአስተጋብኦሙ ፡ ኢየሱስ ፡ ለኵሉ ፡ ሕዝበ ፡ እስራኤል ፡ ውስተ ፡ ሴሎም ፡ ወጸውዖሙ ፡ ለሊቃናተ ፡ እስራኤል ፡ ወለመላእክቲሆሙ ፡ ወለጸሐፍቶሙ ፡ ወአቀሞሙ ፡ ቅድመ ፡ እግዚአብሔር ።
2ወይቤሎሙ ፡ ኢየሱስ ፡ ለኵሉ ፡ ሕዝብ ፡ ከመዝ ፡ ይቤ ፡ እግዚአብሔር ፡ አምላከ ፡ እስራኤል ፡ በማዕዶተ ፡ ፈለግ ፡ ነበሩ ፡ አበዊክሙ ፡ ቀደምት ፡ ታራ ፡ አቡሁ ፡ ለአብርሃም ፡ ወአቡሁ ፡ ለናኮር ፡ ወአምለኩ ፡ ባዕደ ፡ አማልክተ ።
3ወነሣእክዎ ፡ ለአቡክሙ ፡ ለአብርሃም ፡ እምነ ፡ ማዕዶተ ፡ ፈለግ ፡ ወወሰድክዎ ፡ ውስተ ፡ ኵሉ ፡ ምድረ ፡ ከናአን ፡ ወአስተባዛኅኩ ፡ ዘርኦ ።
4ወወሀብክዎ ፡ ይስሐቅሃ ፡ ወለይስሐቅ ፡ ያዕቆብ ፡ ወዔሳው ፡ ወወሀብክዎ ፡ ለዔሳው ፡ ደብረ ፡ ሴይር ፡ አውረስክዎ ፡ ወያዕቆብሰ ፡ ወደቂቁ ፡ ወረዱ ፡ ውስተ ፡ ግብጽ ፡ ወኮኑ ፡ በህየ ፡ ሕዝበ ፡ ዐቢየ ፡ ወበዝኁ ፡ ወጸንዑ ፡ ወሣቀይዎሙ ፡ ግብጽ ።
5ወቀተልክዎሙ ፡ ለግብጽ ፡ በበይነ ፡ ዘገብሩ ፡ ላዕሌሆሙ ።
6ወእምድኅረ ፡ ዝንቱ ፡ አውፅአክሙ ፡ ወአውፅኦሙ ፡ ለአበዊክሙ ፡ ወቦእክሙ ፡ ውስተ ፡ ባሕር ፡ ወዴገኑክሙ ፡ ግብጽ ፡ ወተለውክሙ ፡ ድኅሬሆሙ ፡ ለአበዊክሙ ፡ በአፍራስ ፡ ወበሰረገላት ፡ ውስተ ፡ ባሕረ ፡ [ኤ]ርትራ ።
7ወጸራኅነ ፡ ኀበ ፡ እግዚአብሔር ፡ ወፈነወ ፡ ደመና ፡ ወቆባ[ረ] ፡ ማእከሌነ ፡ ወማእከለ ፡ ግብጽ ፡ ወአስተጋብአ ፡ ላዕሌሆሙ ፡ ባሕረ ፡ ወደፈኖሙ ፡ ወርእያ ፡ አዕይንቲክሙ ፡ ኵሎ ፡ ዘገብረ ፡ እግዚአብሔር ፡ በምድረ ፡ ግብጽ ፡ ወነበርክሙ ፡ ብዙኀ ፡ መዋዕለ ፡ ውስተ ፡ ገዳም ።
8ወወሰደክሙ ፡ ውስተ ፡ ምድረ ፡ አሞሬዎን ፡ እለ ፡ ይነብሩ ፡ ውስተ ፡ ማዕዶተ ፡ ዮርዳንስ ፡ ወተቃተሎሙ ፡ ሙሴ ፡ ወአግብኦሙ ፡ እግዚአብሔር ፡ ውስተ ፡ እዴነ ፡ ወተወረስክሙ ፡ ምድሮሙ ፡ ወአጥፋእክምዎሙ ፡ እምቅድሜክሙ ።
9ወተንሥአ ፡ በላቅ ፡ ወልደ ፡ ሴፎር ፡ ንጉሠ ፡ ሞአብ ፡ ወተቃተሎሙ ፡ ለእስራኤል ፡ ወለአከ ፡ ወጸውዖ ፡ ለበላዓም ፡ ወልደ ፡ ቤዖር ፡ ከመ ፡ ይርግመነ ።
10ወኢፈቀደ ፡ እግዚአብሔር ፡ አምላክከ ፡ ያጥፍእከ ፡ ወበረከተ ፡ ባረከነ ፡ ወአድኀነነ ፡ እምነ ፡ እዴሆሙ ፡ ወአግብኦሙ ፡ ለነ ።
11ወዐደውክሙ ፡ ዮርዳንስ ፡ ወበጻሕክሙ ፡ ውስተ ፡ ኢያሪከ ፡ ወተቃተሉነ ፡ እለ ፡ ይነብሩ ፡ ውስተ ፡ ኢያሪኮ ፡ ወአሞሬዎን ፡ ወከናኔዎን ፡ ወፌሬዜዎን ፡ ወኤዌዎን ፡ ወኢያቡሴዎን ፡ ወኬጤዎን ፡ ወጌርጌሴዎን ፡ ወአግብኦሙ ፡ እግዚአብሔር ፡ ውስተ ፡ እዴነ ።
12ወፈነወ ፡ ላዕሌሆሙ ፡ እምቅድሜነ ፡ ዐኮተ ፡ ወአስዐሮሙ ፡ እምቅድሜነ ፡ ለዐሠርቱ ፡ ወክልኤቱ ፡ ነገሥት ፡ ዘአሞሬዎን ፡ አኮ ፡ በሰይፍከ ፡ ወአኮ ፡ በቀስትከ ።
13ወወሀበክሙ ፡ ምድረ ፡ እንተ ፡ ኢጻመውክሙ ፡ ባቲ ፡ ወአህጉረ ፡ እለ ፡ ኢነደቅሙ ፡ ነበርክሙ ፡ ውስቴቶን ፡ ወአዕጻደ ፡ ወይን ፡ ወዘይት ፡ ዘኢተከልክሙ ፡ ትበልዑ ፡ አንትሙ ።
14ወይእዜኒ ፡ ፍርህዎ ፡ ለእግዚአብሔር ፡ ወአምልክዎ ፡ በጽድቅ ፡ ወበርትዕ ፡ ወአሰስሉ ፡ አማልክተ ፡ ነኪር ፡ ዘአምለኩ ፡ አበዊክሙ ፡ በማዕዶተ ፡ ፈለግ ፡ ወበግብጽ ፡ ወአምልክዎ ፡ ለእግዚአብሔር ።
15ወእመሰ ፡ ኢፈቀድክሙ ፡ ታምልክዎ ፡ ለእግዚአብሔር ፡ ኅረዩ ፡ ለክሙ ፡ ዮም ፡ መነ ፡ ታመልኩ ፡ እመ ፡ አኮ ፡ አማልክተ ፡ አበዊክሙ ፡ እለ ፡ ማዕዶተ ፡ ፈለግ ፡ ወእማእኮ ፡ አማልክተ ፡ አሞሬዎን ፡ እለ ፡ ውስተ ፡ ምድሮሙ ፡ ሀሎክሙ ፡ ወአንሰ ፡ ወቤትየ ፡ እግዚአብሔርሃ ፡ ናመልክ ፡ እስመ ፡ ቅዱስ ፡ ውእቱ ።
16ወአውሥኡ ፡ ሕዝብ ፡ ወይቤሉ ፡ ሐሰ ፡ ለነ ፡ እስከ ፡ ነኀድጎ ፡ ለእግዚአብሔር ፡ ወናመልክ ፡ ባዕደ ፡ አማልክተ ።
17ለነሰ ፡ እግዚአብሔር ፡ አምላክነ ፡ እስመ ፡ ውእቱ ፡ አምላክ ፡ ወውእቱ ፡ አውፅአነ ፡ ለነ ፡ ወለአበዊነ ፡ እምነ ፡ ግብጽ ፡ እምነ ፡ ቤተ ፡ ቅኔት ፡ ወኵሎ ፡ ዘገብረ ፡ ለነ ፡ ተአምረ ፡ ዐበይተ ፡ ወዐቀበነ ፡ በኵሉ ፡ ፍኖት ፡ እንተ ፡ ባቲ ፡ ሖርነ ፡ በውስተ ፡ ኵሉ ፡ አሕዛብ ፡ እለ ፡ ኀለፍነ ፡ ላዕሌሆሙ ።
18ወአውፅኦሙ ፡ እግዚአብሔር ፡ ለአሞሬዎን ፡ ወለኵሉ ፡ አሕዛብ ፡ እለ ፡ ይነብሩ ፡ ውስተ ፡ ምድር ፡ እምቅድሜነ ፡ ወከማሁ ፡ ንሕነሂ ፡ ናመልኮ ፡ ለእግዚአብሔር ፡ እስመ ፡ ውእቱ ፡ አምላክነ ።
19ወይቤሎሙ ፡ ኢየሱስ ፡ ለሕዝብ ፡ ኢትክሉ ፡ አምልኮቶ ፡ ለእግዚአብሔር ፡ እስመ ፡ ቅዱስ ፡ ውእቱ ፡ ወእምከመ ፡ አቅናእክምዎ ፡ ኢየኀድግ ፡ ለክሙ ፡ ኀጣይኢክሙ ፡ ወአበሳክሙ ።
20እምከመ ፡ ኀደግምዎ ፡ ለእግዚአብሔር ፡ ወአምለክሙ ፡ ባዕደ ፡ አማልክተ ፡ ወየሐውር ፡ ወይሣቅየክሙ ፡ ወያጠፍአክሙ ፡ ህየንተ ፡ ዘአሠነየ ፡ ላዕሌክሙ ።
21ወይቤልዎ ፡ ሕዝብ ፡ ለኢየሱስ ፡ ዳእሙ ፡ እግዚአብሔር ፡ ናመልክ ።
22ወይቤሎሙ ፡ [ኢየሱስ ፡] ለሕዝብ ፡ ለሊክሙ ፡ ስምዕ ፡ ላዕለ ፡ ርእስክሙ ፡ ከመ ፡ ለሊክሙ ፡ ኀሬክምዎ ፡ ለእግዚአብሔር ፡ ታምልክዎ ፡ ወይቤሉ ፡ ሰማዕነ ።
23ወይቤሎሙ ፡ ይእዜኒ ፡ አሰስሉ ፡ አማልክተ ፡ ነኪር ፡ ዘኀቤክሙ ፡ ወአርትዑ ፡ ልበክሙ ፡ ኀበ ፡ እግዚአብሔር ፡ አምላከ ፡ እስራኤል ።
24ወይቤልዎ ፡ ሕዝብ ፡ ለኢየሱስ ፡ ለእግዚአብሔር ፡ አምላክነ ፡ ናመልክ ፡ ወቃለ ፡ ዚአሁ ፡ ንሰምዕ ።
25ወተካየዶሙ ፡ ኢየሱስ ፡ ለሕዝብ ፡ በይእቲ ፡ ዕለት ፡ ወወሀቦሙ ፡ ሕገ ፡ ወፍትሐ ፡ በሴሎም ፡ በቅድመ ፡ ደብተራሁ ፡ ለአምላከ ፡ እስራኤል ።
26ወጸሐፎ ፡ ኢየሱስ ፡ ለዝንቱ ፡ ነገር ፡ ውስተ ፡ መጽሐፈ ፡ ሕጉ ፡ ለእግዚአብሔር ፡ ወነሥአ ፡ ኢየሱስ ፡ እብነ ፡ ዐቢየ ፡ ወአቀማ ፡ መትሕተ ፡ ዕፀ ፡ ጤሬብንቶስ ፡ ቅድመ ፡ እግዚአብሔር ።
27ወይቤሎሙ ፡ ለኵሉ ፡ ሕዝብ ፡ ኢየሱስ ፡ ናሁ ፡ ዛቲ ፡ እብን ፡ ስምዕ ፡ ላዕሌክሙ ፡ እስመ ፡ ይእቲ ፡ ሰማዕተ ፡ ኵሉ ፡ ዘተብህለ ፡ በኀበ ፡ እግዚአብሔር ፡ ዘከመ ፡ ተናገ[ረ]ክሙ ፡ ዮም ፡ ወትኩንክሙ ፡ ይእቲ ፡ ስም[ዐ] ፡ ላዕሌክሙ ፡ በደኃሪ ፡ መዋዕል ፡ ለእመ ፡ ሐሰውክምዎ ፡ ለእግዚአብሔር ፡ አምላክየ ።
28ወፈነዎሙ ፡ ኢየሱስ ፡ ለሕዝብ ፡ ወአተው ፡ ኵሎሙ ፡ ውስተ ፡ በሓውርቲሆሙ ።
29ወአምለክዎ ፡ እስራኤል ፡ ለእግዚአብሔር ፡ በኵሉ ፡ መዋዕሊሁ ፡ ለኢየሱስ ፡ ወበኵሉ ፡ መዋዕሊሆሙ ፡ ለሊቃናት ፡ እለ ፡ አንኁ ፡ መዋዕሊሆሙ ፡ እምድኅረ ፡ ኢየሱስ ፡ ወኵሎሙ ፡ እለ ፡ ርእዩ ፡ ግብሮ ፡ ለእግዚአብሔር ፡ ኵሎ ፡ ዘገብረ ፡ ለእስራኤል ።
30ወኮነ ፡ እምድኅረ ፡ ዝንቱ ፡ ወሞተ ፡ ኢየሱስ ፡ ወልደ ፡ ነዌ ፡ ገብረ ፡ እግዚአብሔር ፡ ወምእት ፡ ወዐሠርቱ ፡ ዓመቲሁ ።
31ወቀበርዎ ፡ ውስተ ፡ ደወለ ፡ ርስቱ ፡ ውስተ ፡ ተምናሳረኅ ፡ ውስተ ፡ ደብረ ፡ ኤፍሬም ፡ እመንገለ ፡ መስዑ ፡ ለደብረ ፡ ገላአድ ፤ ህየ ፡ ወደዩ ፡ ምስሌሁ ፡ ውስተ ፡ መቃብሩ ፡ ኀበ ፡ ቀበርዎ ፡ መጣብሐ ፡ ዘእዝኅ ፡ እለ ፡ ቦንቱ ፡ ገዘሮሙ ፡ ለደቂቀ ፡ እስራኤል ፡ በገልጋላ ፡ አመ ፡ ወፅኡ ፡ እምነ ፡ ግብጽ ፡ በከመ ፡ አዘዞ ፡ እግዚአብሔር ፡ ወህየ ፡ ሀለዋ ፡ እስከ ፡ ዮም ።
32ወአዕጽምቲሁኒ ፡ ለዮሴፍ ፡ ዘአውጽኡ ፡ እምነ ፡ ግብጽ ፡ ወከረዩ ፡ ውስተ ፡ ሰቂማ ፡ ውስተ ፡ አሐዱ ፡ ኅብር ፡ ዘገራህት ፡ እንተ ፡ ተሣየጠ ፡ ያዕቆብ ፡ እምነ ፡ አሞሬዎን ፡ እለ ፡ ይነብሩ ፡ ውስተ ፡ ሰቂማ ፡ በምእት ፡ አባግዕ ፡ ወወሀቦ ፡ ለዮሴፍ ፡ ክፍሎ ።
33ወኮነ ፡ እምድኅረ ፡ ዝንቱ ፡ ወእልዐዛር ፡ ወልደ ፡ አሮን ፡ ሊቀ ፡ ካህናት ፡ ሶበ ፡ ሞተ ፡ ወቀበርዎ ፡ ውስተ ፡ ምድረ ፡ [ገ]ባኦር ፡ እንተ ፡ ወሀቦ ፡ ለፊንሕስ ፡ ወልዱ ፡ በደብረ ፡ ኤፍሬም ። ወይእተ ፡ አሚረ ፡ ነሥኡ ፡ ደቂቀ ፡ እስራኤል ፡ ታቦቶ ፡ ለእግዚአብሔር ፡ ወወሰድዋ ፡ ምስሌሆሙ ፡ ወፊንሕስ ፡ ኮነ ፡ ሊቀ ፡ ካህናት ፡ ህየንተ ፡ እልዐዛር ፡ አቡሁ ፡ እስከ ፡ አመ ፡ ሞተ ፡ ወከረዩ ፡ ሎቱ ፡ ውስተ ፡ ገባኦር ፡ ውስተ ፡ ምደሮሙ ። ወአተው ፡ ኵሎሙ ፡ ደቂቀ ፡ እስራኤል ፡ ውስተ ፡ አብያቲሆሙ ፡ ወውስተ ፡ አህጉሪሆሙ ። ወአምለኩ ፡ ደቂቀ ፡ እስራኤል ፡ አስጣርጤን ፡ ወሳጣሮት ፡ ወአማልክተ ፡ አሕዛብ ፡ እለ ፡ ዐውዶሙ ፡ ወአግብኦሙ ፡ እግዚአብሔር ፡ ውስተ ፡ እደ ፡ ኤቅሎን ፡ ንጉሠ ፡ ሞአብ ፡ ወቀነዮሙ ፡ ዐሠርተ ፡ ወሰመንተ ፡ ዓመተ ። (ተፈጸመ ፡ ኦሪት ፡ ዘኢየሱስ ።)