1ወዐርገ ፡ ሙሴ ፡ እምነ ፡ አራቦ[ት] ፡ ዘሞአብ ፡ ውስተ ፡ ደብረ ፡ ና[በው] ፡ ውስተ ፡ ርእሰ ፡ ፈስጋ ፡ ዘሀለወ ፡ ቅድመ ፡ ኢያሪኮ ፡ ወአርአዮ ፡ እግዚአብሔር ፡ ኵሎ ፡ ምድረ ፡ ገላአድ ፤ 2ወኵሎ ፡ ምድረ ፡ ንፍታሌም ፡ ወኵሎ ፡ ምድረ ፡ ምናሴ ፡ ወኵሎ ፡ ምድረ ፡ ይሁዳ ፡ እስከ ፡ ደኃሪት ፡ ባሕር ፤ 3ወገዳሙ ፡ ወአድያሚሃ ፡ ለኢያሪኮ ፡ ሀገረ ፡ ፊንቆን ፡ እስከ ፡ ሴይር ። 4ወይቤሎ ፡ እግዚአብሔር ፡ ለሙሴ ፡ ዛቲ ፡ ምድር ፡ እንተ ፡ መሐልኩ ፡ ለአብርሃም ፡ ወለይስሐቅ ፡ ወለያዕቆብ ፡ ወእቤሎሙ ፡ ለዘርእከ ፡ እሁባ ፡ ወናሁ ፡ አርአይኩካሃ ፡ [ለከ ፡ በአዕይንቲከ ፡] ወህየ ፡ ባሕቱ ፡ ኢትበውእ ። 5ወሞተ ፡ ሙሴ ፡ ቍልዔሁ ፡ ለእግዚአብሔር ፡ በምድረ ፡ ሞአብ ፡ በቃለ ፡ እግዚአብሔር ። 6ወቀበርዎ ፡ ውስተ ፡ ምድር ፡ ቅሩበ ፡ ቤተ ፡ ፌጎር ፡ ወአልቦ ፡ ዘያአምር ፡ መኑሂ ፡ መቃብሮ ፡ እስከ ፡ ዛቲ ፡ ዕለት ። 7ወምእት ፡ ወዕሥራ ፡ ዓመት ፡ ሎቱ ፡ ለሙሴ ፡ አመ ፡ ሞተ ፡ ወኢተሐምጋ ፡ አዕይንቲሁ ፡ ወኢማሰና ። 8ወበከይዎ ፡ ደቂቀ ፡ እስራኤል ፡ ለሙሴ ፡ በአራቦት ፡ ዘሞአብ ፡ በኀበ ፡ ዮርዳንስ ፡ ዘመንገለ ፡ ኢያሪኮ ፡ ሠላሳ ፡ መዋዕለ ፡ ወተፈጸመ ፡ መዋዕለ ፡ ላሑ ፡ ለሙሴ ፡ ዘበከይዎ ። 9ወኢየሱስ ፡ ወልደ ፡ ነዌ ፡ ተመልአ ፡ መንፈሰ ፡ ጥበብ ፡ እስመ ፡ ወደየ ፡ እዴሁ ፡ ሙሴ ፡ ላዕሌሁ ፡ ወተአዘዙ ፡ ሎቱ ፡ ኵሉ ፡ ደቂቀ ፡ እስራኤል ፡ ወገብሩ ፡ ኵሎ ፡ ዘከመ ፡ አዘዞ ፡ እግዚአብሔር ፡ ለሙሴ ። 10ወኢተንሥአ ፡ እንከ ፡ ነቢይ ፡ ውስተ ፡ እስራኤል ፡ ዘከመ ፡ ሙሴ ፡ ዘተናገሮ ፡ ለእግዚአብሔር ፡ ገጸ ፡ በገጽ ፤ 11ወበኵሉ ፡ ተአምር ፡ ወመድምም ፡ ዘፈነዎ ፡ እግዚአብሔር ፡ ከመ ፡ ይግበሮ ፡ በምድረ ፡ ግብጽ ፡ ላዕለ ፡ ፈርዖን ፡ ወላዕለ ፡ መገብቱ ፡ ወላዕለ ፡ ምድሩ ፤ 12ዐበይት ፡ መድምም ፡ ወእድ ፡ ጽንዕት ፡ ወመዝራዕት ፡ ልዑል ፡ ኵሎ ፡ ዘገብረ ፡ ሙሴ ፡ በቅድመ ፡ ኵሉ ፡ እስራኤል ። (ተፈጸመ ፡ ዳግም ፡ ኦሪት ።)