1И сей закон овна иже о преступлении: святая святых суть: 2на месте, на немже закалают всесожжение, да заколют овна иже о преступлении пред Господем, и кровь да пролиют на стояла олтаря окрест: 3и весь тук его да принесет от него, и чресла, и весь тук покрывающий утробу, и весь тук иже на утробе, 4и обе почки, и тук иже на них, иже на стегнах, и препонку, яже на печени, с почками да отимет я: 5и вознесет я жрец на олтарь, принос в воню благовония Господу: о преступлении (бо) есть: 6всяк мужеск пол от жрец да снест я, на месте святе да снедят я: святая святых суть: 7якоже греха ради, тако и преступления ради, закон един их: жрец иже помолится о нем, ему да будет: 8и жрец приносяй всесожжение человечо, кожа всесожжения, еже приносит он, ему да будет: 9и всяка жертва, яже сотворится в пещи, и всяка, яже сотворится на огнищи, или на сковраде, жерцу, иже приносит ю, тому да будет: 10и всяка жертва спряжена с елеем, и яже не спряжена, всем сыном Аароним комуждо равно да будет. 11Сей закон жертвы спасения, юже принесут Господу: 12аще убо похваления ради принесет ю, и принесет на жертву хваления хлебы от муки пшеничны пряжены в елеи, и опресноки помазаны елеем, и муку пшеничну смешену с елеем: 13с хлебы квасными да принесет дар свой на жертву хваления спасителнаго: 14и да принесет един от всех даров своих участие Господу: жерцу возливающему кровь жертвы спасения, тому да будет: 15и мяса жертвы хваления спасителнаго тому да будут, и в оньже день принесутся, да снедятся: да не оставят от него на утрие: 16и аще обет будет, или вольный пожрет дар свой, в оньже аще день жертву свою принесет, да снестся, и на утрие: 17и оставшееся от мяс жертвы до дне третияго на огни да сожжется: 18аще же ядый снест от мяс в день третий, не приимется приносящему ю, ниже вменится ему: осквернение есть: душа же, яже аще снест от них, грех приимет: 19и мяса, яже аще прикоснутся всякому нечисту, да не снедятся, на огни да сожгутся: всяк чистый да снест мяса: 20душа же, яже аще снест от мяс жертвы спасения, яже есть Господу, и нечистота его на нем, погибнет душа она от людий своих: 21всякой вещи нечистей, или от нечистоты человечи или от четвероногих нечистых, или всякой мерзости нечистей, и снест от мяс жертвы спасения, яже есть Господня, погибнет душа та от людий своих. 22И рече Господь к Моисею, глаголя: 23рцы сыном Израилевым, глаголя: всякаго тука говяжа и овча и козия да не снесте: 24и тук мертвечинен и звероядный да сотворится на всяко дело, в ядении же да не снестся: 25всяк ядый тук от скотов, от нихже принесет дар Господу, погибнет душа та от людий своих: 26всякия крове да не снесте во всех селениих ваших и от скотов и от птиц: 27всяка душа, яже аще снест кровь, погибнет душа та от людий своих. 28И рече Господь к Моисею, глаголя: 29и сыном Израилевым речеши, глаголя: приносяй жертву спасения Господу да принесет дар свой Господу, и от жертвы спасения: 30руце его да принесут принос Господу: тук иже на грудех, и препонку печени да принесет я, якоже возложити дар пред Господа: 31и да вознесет жрец тук иже на грудех, на олтарь, и груди да будут Аарону и сыном его, 32и рамо десное да дастся участие жерцу от жертв спасения вашего: 33приносящему кровь спасения и тук от сынов Аароновых, тому да будет рамо десное во участие: 34грудь бо возложения и рамо участия взях от сынов Израилевых от жертв спасения вашего, и дах я Аарону жерцу и сыном его, законно вечно от сынов Израилевых. 35Сие помазание Аароне и помазание сынов его от приносов Господних, в оньже день приведе я жрети Господу: 36якоже заповеда Господь дати им, в оньже день помаза я от сынов Израилевых: законно вечно в роды их. 37Сей закон всесожжений и жертвы, и о гресе и о преступлении, и совершении и жертве спасения: 38якоже заповеда Господь Моисею на горе Синайстей, в оньже день заповеда сыном Израилевым приносити дары своя пред Господа, в пустыни Синайстей.