1Canticum graduum. Sæpe expugnaverunt me a iuventute mea, dicat nunc Israel.
2Sæpe expugnaverunt me a iuventute mea: etenim non potuerunt mihi.
3Supra dorsum meum fabricaverunt peccatores: prolongaverunt iniquitatem suam.
4Dominus iustus concidit cervices peccatorum:
5confundantur et convertantur retrorsum omnes, qui oderunt Sion.
6Fiant sicut fœnum tectorum: quod priusquam evellatur, exaruit:
7De quo non implevit manum suam qui metit, et sinum suum qui manipulos colligit.
8Et non dixerunt qui præteribant: Benedictio Domini super vos: benediximus vobis in nomine Domini.